દેશના યુવાનોમાં આજકાલ વિદેશ જઈને વસવાનું આકર્ષણ વધી રહ્યું છે. ગુજરાતમાં પણ તમે જોતા હશો કે રોજે-રોજ હજારો લોકો વિદેશ ભણવા કે કામ જઈ રહ્યા છે. ભારતીયો અત્યાર સુધી અમેરિકા, ઓસ્ટ્રેલિયા, જર્મની, ડેનમાર્ક, યુએઈ જેવા દેશોમાં જઈને કામ કરવાનું વધારે પસંદ કરતા હતા. જોકે, હવે કેનેડાનો પવન ફુંકાયો છે. પરંતુ વિદેશમાં કામ કરી રૂપિયા કમાવવા ઈચ્છતા લોકો માટે હવે એક યુરોપીયન દેશે પોતાના દરવાજા ખોલ્યા છે. આ દેશ છે નેધરલેન્ડ્સ. નેધરલેન્ડ્સ એક એવો દેશ છે જ્યાં હાલમાં સ્ટાર્ટઅપ્સનો રાફડો ફાટ્યો છે. નેધરલેન્ડ્સની સરકાર આ સ્ટાર્ટઅપ્સમાં કામ કરવાની વિદેશીઓને તક આપી રહી છે. તેના માટે નેધરલેન્ડ્સની સરકારે સ્ટાર્ટઅપ વર્ક વિઝા શરૂ કર્યા છે. આ પ્રોગ્રામનું નામ એસેન્ટિયલ સ્ટાર્ટ-અપ પર્સનલ વર્ક (Essential Start-up Personnel Work Permit) વિઝા છે. આ વિઝા વર્ષ 2021માં શરૂ કરાયા હતા અને તે 4 વર્ષનો પાયલટ પ્રોજેક્ટ છે. એટલે કે તે વર્ષ 2025 સુધી ચાલુ રહેવાનો છે અને જો તેને સારો રિસ્પોન્સ મળશે તો નેધરલેન્ડ્સ સરકાર આ પ્રોગ્રામને એક્સ્ટેન્ડ પણ કરશે. આ વિઝા અંગે ઘણા ઓછા લોકોને જાણ છે. વળી, આકર્ષક વાત તો એ છે કે, આ વિઝા મેળવવા માટે તમારે IELTS પાસ કરવાની જરૂર નથી અને એટલું જ નહીં, તેના માટે ફ્રેશર પણ અરજી કરી શકે છે. તો, ચાલો આપણે આ વિઝા અંગે જાણીએ.
નેધરલેન્ડ્સ સરકારે 4 વર્ષના પાયલટ પ્રોજેક્ટ તરીકે શરૂ કરેલા એસેન્ટિયલ સ્ટાર્ટ-અપ પર્સનલ વર્ક પરમિટમાં વિઝા અંતર્ગત તમને ત્યાંના સ્ટાર્ટ-અપ્સમાં નોકરી કરવાની તક આપવામાં આવે છે. તેના માટે તમારે નેધરલેન્ડ્સના સ્ટાર્ટ-અપમાં નોકરી માટે પહેલા એપ્લાય કરવાનું રહેશે. જો સ્ટાર્ટ-અપ તમને જોબ ઓફર કરે છે, તો તમે આ પ્રોજેક્ટ અંતર્ગત ત્યાંના વિઝા મેળવી શકશો. આ વિઝા માટે નેધરલેન્ડ્સ સરકારે કોઈ લિમિટ નક્કી નથી કરી, એટલે કે ગમે તેટલા લોકોને આ વિઝા મળી શકે છે. હા, એક શરત ચોક્કસ રખાઈ છે કે એક સ્ટાર્ટ-અપ માત્ર વિદેશીને આ પ્રોજેક્ટ અંતર્ગત સ્પોન્સર કરી શકે છે. તમને આ આંકડો નાનો લાગતો હશે, ખરું ને? પરંતુ તમને જાણીને આશ્ચર્ય થશે કે, નેધરલેન્ડ્સમાં 2 લાખથી વધુ સ્ટાર્ટ-અપ્સ છે. એટલે જો એક સ્ટાર્ટ-અપ 5ને સ્પોન્સર લેટર આપે તો, આંકડો 10 લાખે પહોંચે! નેધરલેન્ડ્સમાં દરેક ક્ષેત્રમાં વર્કફોર્સની અછત છે, એટલે તેણે આ પ્રોગ્રામ શરૂ કર્યો છે. તમે આ વિઝા મળ્યા પછી ઈયુ બ્લુ કાર્ડ માટે પણ એપ્લાય કરી શકો છો.તે મળે પછી તમે યુરોપના 25 દેશોમાં કામ કરી શકશો.
આ વિઝા મેળવવા માટે કોઈપણ ફ્રેશર અને અનુભવ ધરાવતી વ્યક્તિ અરજી કરી શકે છે. તેના માટે તમારે પહેલા જે-તે કંપનીમાંથી વર્ક પરમિટ માટે સ્પોન્સર લેટર મેળવવાનો રહે છે. આ વિઝા માટે એપ્લાય કરવા ઉંમરનો કોઈ બાધ નથી. બસ, તમને સ્ટાર્ટ-અપનો સ્પોન્સર લેટર મળવો જોઈએ. આ વિઝા માટે IELTS પાસ હોવું જરૂરી નથી. આ વિઝા માટે અરજીની પ્રોસેસ ઘણી સરળ છે. વળી, અહીં કેનેડાની જેમ લેબર માર્કેટ ઈમ્પેક્ટ એસેસમેન્ટ જરૂરી નથી. હવે, ખર્ચની વાત કરીએ તો આ પ્રોગ્રામ અંતર્ગત તમે ઘણા ઓછા ખર્ચમાં વિઝા મેળવી શકો છો. આ પ્રોજેક્ટ અંતર્ગત 4 વર્ષના વિઝા મળે છે અને વિઝાનો પ્રોસેસિંગ ટાઈમ 90 દિવસનો હોય છે. એટલે કે, 90 દિવસમાં તો વિઝા મળી જ જાય છે. વિઝાનો ખર્ચ 345 યુરો (લગભગ 30,700 રૂપિયા) છે. ઉપરાંત તમારે પ્લેનની ટિકિટનો ખર્ચ કરવો પડી શકે છે. જોકે, કેટલીક કંપનીઓ ટિકિટ પણ સ્પોન્સર કરતી હોય છે.
એક ખાસ વાત યાદ રાખજો કે, યુરોપીયન સીવી અને કવર લેટર બનાવ્યો હોય તો જ નોકરી માટે કોઈ કંપનીમાં એપ્લાય કરજો, નહીં તો તમને નોકરી નહીં મળે. જો તમે નેધરલેન્ડ કે કોઈપણ યુરોપીયન દેશમાં નોકરી કરવા માગો છો તો યુરોપીયન સીવી અને કવર લેટર તૈયાર કરી લેજો. તેના માટે તમે કોઈ કન્સલ્ટન્ટની મદદ લઈ શકો છો. હા, આ સીવી બનાવવો તેઓ રૂપિયા લેતા હોય છે, એટલે એટલો ખર્ચ કરવાની તૈયારી રાખજો.
જર્મનીની જેમ નેધરલેન્ડ્સમાં પણ પગાર ધોરણ ઘણું ઊંચું છે. અહીં બેઝિક સેલેરી મહિનાની 2,543 યુરો (લગભગ 2.26 લાખ રૂપિયા) છે. એ ઉપરાંત તમને જે સ્ટાર્ટ-અપ નોકરી મળી હોય તેના થોડા શેર્સ પણ આપવામાં આવે છે. આમ, એસેન્ટિયલ સ્ટાર્ટ-અપ પર્સનલ વર્ક પરમિટ પ્રોગ્રામ અંતર્ગત જો તમે નેધરલેન્ડ્સના વિઝા મેળવવામાં સફળ થાવ છો તમને મહિને 2થી 3 લાખ રૂપિયા જેટલી કમાણી કરવાની તક મળી રહે છે.
નેધરલેન્ડ્સમાં હોસ્પિટલાલિટી, એગ્રીકલ્ચર, લોજિસ્ટિક, ટુરિઝમ, ડેટા એન્ટ્રી, માર્કેટિંગ, એન્જિનિયરિંગ, એચઆર, સેલ્સ, અકાઉન્ટિગ, ફાઈનાન્સ વગેરે ક્ષેત્રમાં ઘણી તકો છે. આ ઉપરાંત એનર્જી અને કેમિકલ પણ અહીં આકર્ષક ક્ષેત્રમાં સામેલ છે. આ ઉપરાંત કેનન, ટીસીએસ ,હિટાચી, ગૂગલ, માઈક્રોસોફ્ટમાં પણ નોકરીની તક છે. જોકે, આ ટેક કંપનીઓમાં હાઈ-ક્વોલિફાઈડની વધારે માગ રહે છે.
નેધરલેન્ડ્સમાં કામ કરવા માટે સ્ટાર્ટ-અપ વર્ક વિઝા માટે ભલે IELTS પાસ હોવું જરૂરી નથી. પરંતુ નેધરલેન્ડ્સમાં ડચ, જર્મન અને અંગ્રેજી ભાષા ચાલે છે. એટલે, તમારે અહીં કામ કરવા માટે આ ત્રણમાંથી એક ભાષા તો શીખવી જ પડશે.
નેધરલેન્ડ્સ સરકારની વેબસાઈટ પર તમને એસેન્ટિયલ સ્ટાર્ટ-અપ પર્સનલ વર્ક પરમિટ પ્રોગ્રામ અંતર્ગત વિઝા માટે એપ્લિકેશન ફોર્મ મળી જશે. આ ફોર્મ 40 પેજનું છે. એપ્લોયર મળ્યા પછી તે ભરવાનું હોય છે.
