15 ઓક્ટોબર 2022થી કેનેડાએ ઈન્ટરનેશનલ સ્ટૂડન્ટ્સને મોટી રાહત આપતા તેમને ડિસેમ્બર 2023 સુધી જેટલા કલાક જોબ કરવી હોય તે માટે છૂટ આપી હતી. અગાઉના નિયમ અનુસાર, સ્ટૂડન્ટ વિઝા પર આવેલા લોકો સપ્તાહમાં વધુમાં વધુ 20 કલાક જ કામ કરી શકતા હતા. કેનેડાએ વધુ કામ કરવાની છૂટ આપતા તેનો સૌથી વધુ ફાયદો ઈન્ડિયન સ્ટૂડન્ટ્સને થયો છે. મોટાભાગના સ્ટૂડન્ટ્સ ફુડ સર્વિસ, રિટેઈલ તેમજ હોસ્પિટાલિટી અને ફુડ ડિલિવરી જેવા સેક્ટર્સમાં કામ કરતા હોય છે. કેનેડામાં હાલમાં જે ટ્રેન્ડ ચાલી રહ્યો છે તે અનુસાર, સ્ટૂડન્ટ્સને ક્યાં સૌથી સારી અને વધુ પાર્ટ ટાઈમ જોબ્સ મળી શકે છે તેની કેટલીક માહિતી આ આર્ટિકલમાં આપવામાં આવી છે.
કયા સેક્ટરમાં જલ્દી જોબ મળે છે?
કેનેડા આવતા મોટાભાગના સ્ટૂડન્ટ્સ અહીંની રેસ્ટોરાં, બાર, વેરહાઉસ તેમજ ફુડ ડિલિવરી, સિક્યોરિટી ગાર્ડ અને કેબ ચલાવવાનું કામ કરતા હોય છે. આ જોબ્સમાં એવરેજ કલાકની 16 ડોલર સેલેરી મળે છે, આ ઉપરાંત તેમને સારી એવી ટીપ્સ પણ મળે છે. તેમાં કામકાજના કલાકો પણ ફ્લેક્સિબલ હોય છે. એક અંદાજ અનુસાર, કેનેડામાં બિલ પર લોકો 15થી 18 ટકા જેટલી ટીપ આપતા હોય છે. સારી વાત એ છે કે, જો ટીપ રોકડામાં ચૂકવાય તો સ્ટૂડન્ટ્સને તેના પર ટેક્સ ચૂકવવાનો નથી થતો. ઘણીવાર તો સારૂં કામ કરનારા સ્ટૂડન્ટ્સ ટીપ દ્વારા જ એક વીકમાં 200-400 ડોલર એક્સ્ટ્રા કમાઈ લેતા હોય છે. જોકે, કેટલીક જોબ એવી પણ છે કે જેમાં તમારે પહેલા તો તેને લગતો કોર્સ કરીને લાઈસન્સ લેવું પડે છે, જેમ કે સિક્યોરિટી ગાર્ડની જોબ કેનેાડમાં એમ જ નથી મળી જતી. પરંતુ એકવાર લાઈસન્સ લીધા બાદ તમારો અનુભવ જેમ-જેમ વધતો જાય તેમ-તેમ તમારી સેલેરી પણ વધતી જાય છે.
કેબ ચલાવવામાં પણ સારી કમાણી
ઈન્ડિયામાં જેમ ઓલા અને ઉબર જેવી એપ બેઝ્ડ કેબ સર્વિસ પોપ્યુલર છે તેવી જ રીતે કેનેડાના ટોરન્ટો, વાનકુંવર તેમજ મોન્ટરિયલ જેવા શહેરોમાં ઉબર અને લિફ્ટ નામની રાઈડ-શેરિંગ એપ્સ પોપ્યુલર છે. જો સ્ટૂડન્ટની ઉંમર 21 વર્ષથી વધારે હોય અને તેની પાસે ડ્રાઈવિંગ લાઈસન્સ, કાર તેમજ સ્માર્ટફોન હોય તો તે કેબ ચલાવીને પણ સારા એવા ડોલર કમાઈ શકે છે. તેમાં સૌથી સારી વાત એ છે કે, તમારે કોઈની નોકરી નથી કરવી પડતી. તમે તમારી અનુકૂળતાએ કામ કરી શકો છો. જોકે, તેમાં ફિક્સ સેલેરી પણ નથી મળતી. તમારી કમાણીનો આધાર તમને કેટલી રાઈડ મળે છે, તેનું ડિસ્ટન્સ કેટલું છે તેના પર પણ રહે છે.
સ્કોલર સ્ટૂડન્ટ્સ માટે કઈ જોબ્સ ઉપલબ્ધ છે ?
જે સ્ટૂડન્ટ્સ ભણવામાં ખૂબ જ હોંશિયાર છે તેમજ પોસ્ટ ગ્રેજ્યુએશનનો અભ્યાસ કરવા કે પછી રિસર્ચ સ્કોલર તરીકે કેનેડા ગયા છે તેમના માટે એજ્યુકેશન સેક્ટરમાં પણ સારી તક છે. આવા સ્ટૂડન્ટ્સ જ્યાં ભણતા હોય ત્યાં કે પછી બીજી કોઈ કોલેજ કે યુનિવર્સિટીમાં ટિચિંગ આસિસ્ટન્ટની જોબ કરી શકે છે. આ જોબમાં ક્વોલિફિકેશન પણ ઉંચી હોવાથી તેમાં સેલેરી પણ વધુ મળે છે.
એક અંદાજ અનુસાર, ટિચિંગ આસિસ્ટન્ટને 23થી 25 ડોલર પ્રતિ કલાક ચૂકવવામાં આવે છે. ઘણી વાર સ્ટૂડન્ટ્સ જે કોલેજ કે યુનિવર્સિટીમાં ભણતા હોય ત્યાં જ તેમને આ જોબ મળી જવાથી ટ્રાન્સપોર્ટેશનનો કોઈ ઈશ્યૂ નથી મળતો, અને જે-તે સબ્જેક્ટના એક્સપર્ટ સાથે કામ કરીને તેમની પાસેથી નવું-નવું શીખવાનો પણ ગોલ્ડન ચાન્સ મળે છે. ટીચિંગ આસિસ્ટન્ટ ઉપરાંત કેનેડામાં ટ્યૂટર બનીને પણ સ્ટૂડન્ટ્સ સારા એવા ડોલર્સ કમાઈ શકે છે. રિપોર્ટ્સ અનુસાર, તેમાં કલાકના 30 ડોલર જેટલો પે ઓફર કરવામાં આવે છે. જોકે, આમાં પણ હાઈલી ક્વૉલિફાઈડ હોય તેમજ સારો એકેડમિક રેકોર્ડ ધરાવતા હોય તેવા સ્ટૂડન્ટ્સને જ ચાન્સ મળે છે.
કેનેડામાં જોબ કેવી રીતે શોધશો
કેનેડામાં તમારા કોન્ટેક્ટ્સ જેટલા સારા હશે તેટલી જલ્દી તમે જોબ શોધી શકો છો, પરંતુ કોન્ટેક્ટ્સ નહીં હોય તો નોકરી નહીં મળે તેવું પણ નથી. કેનેડામાં ઘણી એવી વેબસાઈટ્સ તેમજ ટૂલ્સ છે કે જે તમને પાર્ટ ટાઈમ કે ફુલટાઈમ જોબ ઓફર કરે છે. જેમાં ઈન્ડીડ, જોબબેંક.સીએ, વર્કોપોલીસ, ટેલેન્ટએગ, મેગ્નેટ તેમજ લીપગ્રેડ જેવી વેબસાઈટ્સનો પણ સમાવેશ થાય છે.
કેનેડામાં 1 એપ્રિલ 2022થી કોઈપણ પ્રાંતમાં કામ કરવાનું 1 કલાકનું ઓછામાં ઓછું વેતન 15.55 ડોલર નક્કી કરવામાં આવ્યું છે. કેનેડામાં ત્યાંના નાગરિકોને કામકાજના સ્થળે જે રાઈટ્સ મળે છે તે જ રાઈટ્સ વિદેશી કામદારોને પણ મળે છે. સ્ટૂડન્ટ વિઝા પર કામ કરીને તમે જે અનુભવ પ્રાપ્ત કરશો તે આગળ જતાં તમને વર્ક પરમિટ તેમજ પીઆરમાં પણ મદદરૂપ બનશે.
