એસજી હાઈવે પર આવેલા ગોતાબ્રિજ પર મોડી રાતે હિટ એન્ડ રનના એક ગમખ્વાર બનાવમાં એક એકટીવાચાલક યુવકનું કરૂણ મોત નીપજયું હતું. જેને પગલે સમગ્ર વિસ્તારમાં ખાસ કરીને સ્થાનિકોમાં ભારે અરેરાટીની લાગણી ફેલાઇ ગઇ હતી. તો બીજીબાજુ, યુવકના પરિજનો પર જાણે આઘાતનું આભ તૂટી પડયું હતું. શેવરોલેટ ક્રૂઝ કારના ચાલકે બેફામ રીતે પોતાની કાર હંકારી ગોતા બ્રિજ પર બાઇક અને એક્ટિવા પર જતા પ્રસંગ પાર્ટી પ્લોટના મેનેજર અને ઓફિસબોયને અડફેટે લેતાં બાઈકચાલક મેનેજરનું મોત નીપજ્યું હતું, જયારે એક્ટિવાચાલક ઓફિસબોયને ઈજા પહોંચતાં સારવાર માટે સોલા સિવિલ હોસ્પિટલ ખસેડવામાં આવ્યો હતો. એ ડિવિઝન પોલીસે કારચાલક વિરુદ્ધ ગુનો નોંધી ક્રૂઝ કારચાલકની ધરપકડ કરી લીધી હતી. આ અંગે પ્રાપ્ત માહિતી મુજબ, શહરેના ઘાટલોડિયા કૃષ્ણનગરમાં મુકેશ બલાઈ (ઉ.વ.ર૮) તેના પરિવાર સાથે રહે છે. મુકેશ એસજી હાઇવે પર આવેલા પ્રસંગ પાર્ટી પ્લોટમાં ઓફિસબોય તરીકે નોકરી કરે છે. જ્યારે ઘાટલોડિયાની નાલંદા સ્કૂલ પાસે આવેલા પાર્થ એવન્યૂમાં રહેતા જિજ્ઞેશભાઈ પટેલ (ઉ.વ.૩૪) પ્રસંગ પાર્ટી પ્લોટના મેનેજર તરીકે નોકરી કરતા હતા. ગઈ કાલે મોડી રાતે બાર વાગ્યાની આજુબાજુ મુકેશ એક્ટિવા પર અને જિજ્ઞેશભાઈ બાઈક પર ઘરે જવા માટે સાથે નીકળ્યા હતા. સાડા બાર વાગ્યાની આસપાસ બંને પોતાના વાહન પર ગોતાબ્રિજ પરથી પસાર થઇ રહ્યા હતા ત્યારે પાછળથી એક કાર પુરપાટ ઝડપે આવી હતી અને મુકેશના એક્ટિવા અને જિજ્ઞેશભાઈના બાઈકને ટક્કર મારી હતી. ટક્કર વાગતાં બંને વાહન પરથી ઊછળી નીચે પટકાયા હતા. અકસ્માત એટલો ગંભીર હતો કે જિજ્ઞેશભાઈનું બાઈક અને એક્ટિવા બંને ર૦ ફૂટ દૂર જઈને પડ્યા હતા. બંનેને ગંભીર ઈજાઓ થતાં સારવાર માટે સોલા સિવિલ હોસ્પિટલ ખસેડવામાં આવ્યા હતા. જ્યાં જિજ્ઞેશભાઈનું મોત નીપજ્યું હતું. અકસ્માત બાદ કારચાલક ત્યાંથી ફરાર થઇ ગયો હતો. બીજી તરફ પોલીસને જાણ કરવામાં આવતા એ ડિવિઝન ટ્રાફિક પોલીસ ઘટનાસ્થળે દોડી ગઈ હતી. લોકોએ કારચાલકનો પીછો કરી ગોતા વિસ્તારમાંથી લેન્ડ ક્રૂઝના કારચાલકને ઝડપી લઈ પોલીસના હવાલે કર્યો હતો. એ ડિવિઝન પોલીસે કારચાલક વિરુદ્ધ ગુનો નોંધી તેમની ધરપકડ કરી હતી. જો કે, બનાવને પગલે અને યુવકના મોતને લઇ વિસ્તારમાં અરેરાટીની લાગણી ફેલાઇ ગઇ હતી.
પાછલી પોસ્ટ
આગળની પોસ્ટ
