Aapnu Gujarat
આંતરરાષ્ટ્રીય સમાચાર

અમેરિકામાં ગેસ સ્ટેશનમાં કામ કરતા ભારતીય યુવકની હત્યા

અમેરિકાના જ્યોર્જિયા સ્ટેટમાં આવેલા લિથોનિયામાં બનેલી એક ભયાનક ઘટનામાં ૨૫ વર્ષના ભારતીય યુવકની એક હોમલેસ વ્યક્તિ દ્વારા ઘાતકી હત્યા કરવામાં આવી છે. અમેરિકન મીડિયાના રિપોર્ટ્સ અનુસાર, મૃતકનું નામ વિવેક સૈની હોવાનું જાણવા મળ્યું છે, જે એક ગેસ સ્ટેશનમાં કામ કરતો હતો. વિવેક જે ગેસ સ્ટેશનમાં જોબ કરતો હતો તે લિથોનિયાના ક્લેવલેન્ડ રોડ પર આવેલું હતું. જે વ્યક્તિએ વિવેકની હત્યા કરી છે તેની ઓળખ જુલિયાન ફોલ્કનર તરીકે કરવામાં આવી છે, પોલીસના જણાવ્યા અનુસાર હત્યારાની ઉંમર ૫૩ વર્ષ છે, અને તે લિથોનિયાની આસપાસના વિસ્તારોમાં જ ફરતો રહેતો હતો.

જોકે, ચોંકાવનારી વાત એ છે કે હાલ અમેરિકામાં કાતિલ ઠંડી પડી રહી છે અને વિવેકે તેની હત્યા કરનારા જુલિયાનને તેના ગેસ સ્ટેશન પાસે આશરો આપ્યો હતો. વિવેકની સાથે કામ કરતા બીજા એક વ્યક્તિના જણાવ્યા અનુસાર, હત્યારો બે દિવસથી તેમના ગેસ સ્ટેશન પાસે જ રહેતો હતો. વિવેકે તેને ચિપ્સ તેમજ કોલ્ડડ્રીંક આપવાની સાથે ઠંડીથી બચવા માટે જેકેટ પણ આપ્યું હતું.

મૃતક વિવેકને અમેરિકા આવ્યે હજુ ખાસ સમય પણ નહોતો થયો, તે તાજેતરમાં જ MBA થયો હતો. વિવેકની નજીકમાં જ આવેલા એક ગેસ સ્ટેશન પર જોબ કરતાં એક ગુજરાતી વ્યક્તિએ જણાવ્યું હતું કે વિવેક ખૂબ જ દયાળુ વ્યક્તિ હતો, પરંતુ તેણે જેને આશરો આપ્યો હતો, જેને બે દિવસ સુધી મફતમાં જમવાનું આપ્યું હતું તે જ વ્યક્તિએ તેનો જીવ લીધો હતો.

વિવેકનો હત્યારો જુલિયાન એક ગુજરાતીના ગેસ સ્ટેશન પર પણ નિયમિત આવતો હતો અને મોટાભાગે ઘણીવાર કોફી કે પછી સિગરેટ લઈને પૈસા આપ્યા વિના જ જતો રહેતો હતો. વિવેકની સાથે કામ કરતા લોકોના જણાવ્યા અનુસાર, ગેસ સ્ટેશન પર બે દિવસથી પડ્યા-પાથર્યા રહેતા જુલિયાનને તે લોકો કાતિલ ઠંડીને કારણે ત્યાંથી જવા માટે પણ કહી શકે તેમ નહોતા.

જોકે, વિવેકની હત્યા થઈ ત્યારે એટલે કે ૧૫ જાન્યુઆરીએ તેણે જુલિયાનને જતા રહેવા માટે વિનંતી કરી હતી. વિવેકને ડર હતો કે જો તેના ઓનરને આ અંગે ખબર પડી તો તેની નોકરી જોખમમાં આવી જશે, અને એટલે જ તેણે જુલિયાનને ગેસ સ્ટેશનથી દૂર જતા રહેવા કહ્યું હતું, પરંતુ જુલિયાન વિવેક પર ગુસ્સે થઈ ગયો હતો અને તેણે સ્ટોરની અંદર ઘૂસીને વિવેકના માથા પર હથોડાના ઘા ઝીંકી દીધા હતા.

જુલિયાને વિવેકને ઢાળી દીધો ત્યારબાદ ક્રાઈમ સીન પર ચાર-પાંચ લોકો આવ્યા હોવાનું પણ સીસીટીવી ફુટેજમાં જોવા મળ્યું હતું, જેમાં એક મહિલા પણ હતી અને કદાચ તેમાંથી જ કોઈએ પોલીસને આ બાબતે ફોન કરીને જાણ કરી હતી.

પોલીસના જણાવ્યા અનુસાર, આ ઘટના બની ત્યારે વિવેક તેની શિફ્ટ પૂરી કરીને ઘરે જવાની તૈયારીમાં હતો અને તે જ વખતે તેના પર જુલિયાને પાછળથી તેના પર જીવલેણ હુમલો કર્યો હતો. સીસીટીવી કેમેરામાં કેદ થયેલા દ્રશ્યોમાં દેખાઈ રહેલા સમય અનુસાર, વિવેક સૈની પર ૧૬ જાન્યુઆરીએ રાત્રે સવા બાર વાગ્યે હુમલો કરવામાં આવ્યો હતો.
જુલિયાન બ્લૂ કલરનું હૂડી પહેરીને વિવેકની નજીક આવ્યો હતો અને તેણે સેકન્ડોમાં જ તેના પર અટેક કરી દીધો હતો. જુલિયાને માથામાં હથોડી ઝીંકતા વિવેક ત્યાં જ ઢળી પડ્યો હતો, અને પછી હત્યારો સ્ટોરમાં જ આંટાફેરા કરીને વારંવાર જમીન પર પડેલા વિવેકની નજીક આવતો હતો અને ફરી તેના પર અટેક કરતો હતો, આ જ રીતે તે પાંચ મિનિટ સુધી વિવેકને મારતો રહ્યો હતો.
વિવેક સાથે કામ કરતા એક વ્યક્તિના જણાવ્યા અનુસાર, તેના માથા અને ચહેરા પર હત્યારાએ ૫૦થી પણ વધુ ઘા ઝીંક્યા હતા, અને પોલીસ ના આવી ત્યાં સુધી તે સ્ટોરમાં જ રહ્યો હતો.

હત્યારાના હાથમાં હથોડી જોઈને પોલીસે તેને દૂરથી જ હથોડી ફેંકી દેવા માટે જણાવ્યું હતું, અને ત્યારબાદ પોલીસ વિવેકની નજીક ગઈ ત્યાં સુધીમાં તેના શ્વાસ બંધ થઈ ચૂક્યા હતા.

Related posts

बिलावल के बारिश के सिद्धांत से वैज्ञानिक चकराए : इमरान

aapnugujarat

પાકિસ્તાનમાં સેના વિરુદ્ધ લાગ્યા ઉગ્ર સૂત્રોચ્ચાર, તાલિબાનોની ઓફિસે આગચંપી

aapnugujarat

गिलगित-बाल्टिस्तान की जनता के आगे इमरान सरकार ने टेके घुटने

editor
UA-96247877-1