ઈલિયાના ડિક્રૂઝે દીકરાને આપ્યો જન્મ

એવલિન શર્મા, ઈશિતા શર્મા, અર્જુન રામપાલ, ગૌહર ખાન અને રામ ચરણ બાદ વધુ એક સેલિબ્રિટી પેરેન્ટ્સ ક્લબમાં સામેલ થઈ છે. અહીંયા વાત થઈ રહી છે, એપ્રિલમાં પ્રેગ્નેન્સીની જાહેરાત કર્યા બાદ ચર્ચામાં આવેલી ઈલિયાના ડિક્રૂઝની (Ileana D’Cruz). તે હવે મમ્મી બની ગઈ છે અને તેણે દીકરાને જન્મ આપ્યો છે. આ ખુશખબરી તેણે સોશિયલ મીડિયા હેન્ડલ થકી આપી છે. તેણે પોતાના નવજાત દીકરાની તસવીર શેર કરી છે તેમજ તેનો જન્મ કઈ તારીખે થયો તે જણાવ્યું છે. આ સાથે તેના નામનો પણ ખુલાસો કરી દીધો છે. જણાવી દઈએ કે, ઈલિયાના બોયફ્રેન્ડ સાથે લગ્ન કર્યા વગર પ્રેગ્નેન્ટ થતાં ખૂબ કોન્ટ્રોવર્સી થઈ હતી અને તે ટ્રોલિંગનો શિકાર પણ બની હતી. જો કે, આ વાત તેને પ્રભાવિત કરી શકી નહોતી. તેણે આ સમય દરમિયાન બેબી બમ્પ ફ્લોન્ટ કરતી ઘણી તસવીરો ફેન્સ માટે અપલોડ કરી હતી. ઈલિયાના ડિક્રૂઝે શનિવારે રાતે તે મોમ બની હોવાની જાહેરાત કરી હતી. તેણે પોતાના ઈન્સ્ટાગ્રામ હેન્ડલ પર દીકરાની તસવીર શેર કરી છે, જેમાં તે શાંતિથી ઉંઘી રહ્યો છે. આ સાથે લખ્યું છે ‘ઈન્ટ્રોડ્યૂસિંગ કોઆ ફોનિક્સ ડોલન (Koa Phoenix Dolan)’. કેપ્શનમાં લખ્યું છે ‘કોઈ પણ શબ્દ તે લાગણીને વ્યક્ત કરવામાં અસક્ષમ છે કે અમે અમારા દીકરાને આ દુનિયામાં લાવીને કેટલા ખુશ છીએ. હૈયુ ભરાઈ ગયું છે’. કોઆનો અર્થ થાય છે ‘યોદ્ધા’. નરગિસ ફખરી, આથિયા શેટ્ટી, આસ્થા શર્મા, ડબ્બૂ રત્નાની, આશિ દુઆ, હુમા કુરૈશી તેમજ કરણવીર શર્મા સહિતના ઈન્ડસ્ટ્રીના મિત્રોએ ઈલિયાનાને અભિનંદન પાઠવ્યા છે તો તેના દીકરા પર પ્રેમ વરસાવ્યો છે. આ સિવાય ફેન્સ પણ તેને મુબારક આપી રહ્યા છે અને તેના દીકરાને ક્યૂટ ગણાવી રહ્યા છે. કેટલાક ફેન્સે રેડ હાર્ટ ઈમોજી ડ્રોપ કર્યા છે. ઈલિયાના ડિક્રૂઝે પ્રેગ્નેન્સીની જાહેરાત કરી ત્યારથી તેના આવનારા બાળકનો પિતા કોણ છે તે અંગે ઘણા સવાલ ઉઠી રહ્યા હતા. એક્ટ્રેસનું નામ પહેલા કેટરીના કૈફના ભાઈ સ્ટેબસ્ટિયન લૌરેંટ માઈકલ સાથે લિંક થયું હતું. ત્યારે આ બાળક તેનું જ હશે તેવી અટકળો હતી. પરંતુ જુલાઈ મહિનાના મધ્યમાં ઈલિયાનાએ બોયફ્રેન્ડ સાથેની ડિનર ડેટની તસવીરો શેર કરીને આ અફવા પર પૂર્ણવિરામ મૂક્યું હતું. આ બધાની વચ્ચે સવાલ એ થઈ રહ્યો છે કે, શું ઈલિયાના ડિક્રૂઝે બોયફ્રેન્ડ સાથે લગ્ન કરી લીધા છે? ડીએનએના રિપોર્ટ પ્રમાણે, એક્ટ્રેસના બોયફ્રેન્ડનું નામ માઈકલ ડોલન છે. બંને આ વર્ષના 13 મેના રોજ વેડિંગ કરી લીધા હતા, આ તેણે ઈન્સ્ટાગ્રામ પર પ્રેગ્નેન્સીની જાહેરાત કરી તેના ચાર અઠવાડિયા પહેલા થયું હતું. બંને છેલ્લા એક વર્ષથી રિલેશનશિપમાં હતા. વર્ક ફ્રંટની વાત કરીએ તો, ઈલિયાના છેલ્લે બાદશાહ સાથે આલ્બમ સોન્ગ ‘સબ ગઝબ’માં દેખાઈ હતી, જે એપ્રિલમાં રિલીઝ થયું હતું. તે હવે ફિલ્મ ‘અનફેર એન્ડ લવલી એન્ડ લવર્સ’માં દેખાશે.