ડિરેક્ટરેટ જનરલ ઓફ સિવિલ એવિએશન (DGCA)એ એર ઈન્ડિયાને 30 લાખ રૂપિયાનો દંડ ફટકાર્યો છે. દુબઈ-દિલ્હી ફ્લાઈટ મામલે સુરક્ષા સંબંધી બેદરકારી પર એર ઈન્ડિયા (Air India)ને આ દંડ કરાયો છે. હકીકતમાં, દિલ્હી-દુબઈ ફ્લાઈટ AI 915ના પાઈલટએ નિયમોનું ઉલ્લંઘન કર્યું હતું. ગત 27મી ફેબ્રુઆરીએ પાઈલટે પોતાની મહિલા મિત્રને કોકપિટમાં જવા દીધી હતી. આ મામલે ડીજીસીએએ કાર્યવાહી કરી છે. ડીજીસીએએ તેને મોટી બેદરકારી માની છે. પાઈલટને ત્રણ મહિના માટે સસ્પેન્ડ કરી દેવાયો છે. જ્યારે કો-પાઈલટને ચેતવણી આપવામાં આવી છે. હાલમાં આ મામલે એર ઈન્ડિય પણ તપાસ કરી રહી છે.
27 ફેબ્રુઆરી, 2023એ બનેલી આ ઘટનાની ફરિયાદ કબિન ક્રૂના એક કર્મચારીએ કરી હતી. આ મામલે એર ઈન્ડિયાએ જણાવ્યું હતું કે, તેણે ફરિયાદને ગંભીરતાથી લીધી છે. એર ઈન્ડિયાની આ ફ્લાઈટ દુબઈથી દિલ્હી આવી રહી હતી. આ દરમિયાન એર ઈન્ડિયાના પાઈલટે મહિલા મિત્રને કોકપિટમાં બેસવાની મંજૂરી આપી હતી. આ મામલાની તપાસ એર ઈન્ડિયા પણ કરી રહી છે.
ઉલ્લેખનીય છે કે, આ વર્ષે જાન્યુઆરીમાં પણ એર ઈન્ડિયાને દંડ થયો હતો. આ મામલો મહિલા સાથે ગેરવર્તણૂકનો હતો. ન્યૂયોર્કથી દિલ્હી આવી રહેલી એર ઈન્ડિયાની ફ્લાઈટમાં એક શખસે વૃદ્ધ મહિલા સાથે ગરવર્તણૂક કરી હતી. મહિલાએ તેની ફરિયાદ વિમાનમાં હાજર ક્રૂ મેમ્બર્સને કરી હતી, પરંતુ કાર્યવાહી થઈ ન હતી. આ મામલે ડીજીસીઆઈએ એર ઈન્ડિયાને દંડ ફટકાર્યો હતો.
