બોલિવૂડ એક્ટ્રેસ શર્લિન ચોપરા (Sherlyn Chopra) ફરી એકવાર ચર્ચામાં છે અને આ વખતે તે મોલેસ્ટેશન (છેડતી)ના કેસને લઈને ચર્ચામાં છે. વાત જાણે એમ છે કે શર્લિને મુંબઈ સ્થિત ફાઈનાન્સર પર છેડતીનો આરોપ લગાવ્યો છે. શર્લિને ફાઈનાન્સર પર આરોપ લગાવ્યો છે કે વીડિયો રેકોર્ડિંગ માટે પૈસા આપવાના બહાને તેની છેડતી કરાઈ છે. શર્લિને કહ્યું કે તે વ્યક્તિએ તેની સાથે દુર્વ્યવહાર કર્યો, ગાળો આપી અને જ્યારે તેણે વિરોધ કર્યો તો તેણે તેને મારી નાખવાની ધમકી પણ આપી.
રિપોર્ટ્સમાં જણાવાયું છે કે શર્લિને તે ફાઇનાન્સર વિરુદ્ધ જુહુ પોલીસ સ્ટેશનમાં ફરિયાદ નોંધાવી છે. એવા અહેવાલ છે કે આ વ્યક્તિ વિરુદ્ધ વિવિધ કલમો હેઠળ કેસ નોંધવામાં આવ્યો છે જેમાં IPCની કલમ 354, 506 અને 509નો સમાવેશ થાય છે. પોલીસ આ કેસની તપાસમાં લાગેલી છે. તાજેતરમાં જ શર્લિન ઘણી ચર્ચામાં આવી હતી જ્યારે તેણે #MeTooના આરોપી સાજિદ ખાન વિરુદ્ધ અવાજ ઉઠાવ્યો હતો.
ઉલ્લેખનીય છે કે શર્લિન ચોપરાએ ઓક્ટોબર 2021માં રાજ કુંદ્રા અને શિલ્પા શેટ્ટી સામે કેસ નોંધ્યો હતો. તેણે ફ્રોડ અને માનસિક શોષણનો પણ આરોપ લગાવ્યો હતો તેમજ 50 કરોડની માનહાનિનો દાવો પણ કર્યો હતો. તેણે કહ્યું હતું ‘રાજ કુંદ્રા મારા ગુરુ હતા. તેણે મને તેમ કહીને ગેરમાર્ગે દોરી હતી કે, તે જે કંઈ પણ શૂટ કરી રહ્યો છે તે ગ્લેમર માટે નથી. મને ત્યાં સુધી કહેવામાં આવ્યું હતું કે, શિલ્પા શેટ્ટીને પણ મારા વીડિયો અને તસવીરો પસંદ છે. રાજ કુંદ્રાએ મને ખાતરી આપી હતી કે સેમી ન્યૂડ અને પોર્ન આજના સમયમાં કોઈ મોટી વાત નથી, આ દરેક કોઈ કરે છે અને મારે પણ આવું જ કરવું જોઈએ’. પોર્નોગ્રાફી કેસ મામલે રાજ કુંદ્રાની ધરપકડ થઈ હતી અને પછી તેનો જામીન પર છુટકારો થયો હતો.
