સેલિબ્રિટી ચેટ શો કોફી વિથ કરણમાં હાર્દિક પંડ્યા અને કે એલ રાહુલ દ્વારા મહિલાઓ અંગે વિવાદાસ્પદ ટિપ્પણી બાદ તેમને ક્રિકેટ ટીમમાંથી સસ્પેન્ડ કરવામાં આવ્યા છે. આ બાબત સુપ્રીમ કોર્ટ સુધી પહોંચી ગઇ છે. સુપ્રીમમાં ૫ જાન્યુઆરીએ આ મામલે તપાસ માટે લોકપાલની નિમણૂકને લઇ તપાસ થવાની છે. આવામાં શોના એન્કર કરણ જોહરે આ અંગે મૌન તોડ્યું છે. તેમણે આ અંગે સ્પષ્ટતા કરતા માફી માંગી છે.
કરણ જોહરે આ અંગે વાત કરતા જણાવ્યું હતું કે, હું આ તમામ ઘટના માટે પોતાને જવાબાદર માનું છું કેમકે શો મારો છે અને મંચ પણ મારો છે. મેં બન્ને હાર્દિક પંડ્યા અને કેએલ રાહુલને શોમાં બોલાવ્યા હતા. આ વિવાદને લીધે જે પરિણામ આવ્યું છે તેના માટે હું જવાબદાર છું. આને કારણે મને ઘણી રાત સુધી ઉંઘ પણ આવી નહતી હું વિચારતો હતો કે આ નુકસાનની ભરપાઇ હું કેવી રીતે કરીશ, મારી વાત કોણ સાંભળશે હવે આ વાત મારા હાથમાંથી નીકળી ગઇ છે.
કરણે વધુ જણાવ્યું હતું કે, મેં તેમને જે પ્રશ્ન કર્યા તે જ પ્રશ્ન મેં મહિલાઓને પણ પૂછ્યા હતા. જ્યારે દીપીકા અને આલીયા ભટ્ટ મારા શોમાં આવી હતી મેં તેમને પણ આ પ્રશ્ન કર્યા હતા. મારો તેમના ઉત્તર પર કોઇ નિયંત્રણ નથી.
હાર્દિક અને રાહુલ વિરુદ્ધ બોર્ડ દ્વારા કરવામાં આવેલી કાર્યવાહી અંગે પ્રશ્ન કરતા કરણે જણાવ્યું કે, મને તેમની સાથે જે થયું તેનો અફસોસ છે. તેમણે જણાવ્યું હતું કે, મારી પ્રોડક્શન ટીમમાં ૧૫-૧૬ મહિલાઓ છે. તેમાંથી એક પણ મહિલાએ તેમના ઉત્તરનો વાંધો દર્શાવ્યો નહતો. જો કે તેમની કારકિર્દીમાં મારા કારણે જે નુકસાન થયું તેના માટે હું માફી માંગુ છું. તેમણે જે કર્યું તેના માટે તેમણે કિંમત ચૂકવી દીધી છે.
પંડ્યા- રાહુલ : કરણે માફી માંગી, કહ્યું- મારો શો છે, વિવાદ માટે હું જવાબદાર છું
