ભારતીય વિદ્યાર્થીઓને હાલામાં કેનેડામાં ઉચ્ચ અભ્યાસ માટે જવાનું ઘેલું લાગ્યું છે. જેમાં ગુજરાતીઓની સંખ્યા પણ ઘણી મોટી છે. હવે ઈન્ટરનેશનલ સ્ટુડન્ટ્સે કેનેડામાં અભ્યાસ પરમિટની અરજી માટે અરજી કરવા પાત્ર બનવા માટે તેમની ટ્યુશન ફીનો સંપૂર્ણ અથવા અમુક ભાગ ચૂકવવાની જરૂર નથી. ફેડરલ કોર્ટે એક મહત્વપૂર્ણ ચુકાદામાં જણાવ્યું હતું કે જ્યાં સુધી આંતરરાષ્ટ્રીય વિદ્યાર્થીઓ જરૂર પડે ટ્યુશન અને અન્ય ખર્ચાઓ ચૂકવવાની તેમની ક્ષમતા સાબિત કરી શકે છે, ત્યાં સુધી તેમને સ્ટડી પરમિટ માટે અરજી કરવા માટે આમંત્રિત કરી શકાય છે અને અરજીના સબમિશન સ્ટેજ દરમિયાન અનપેઈડ ટ્યુશન માટે દંડ કરવામાં આવશે નહીં.
આ ચુકાદો ઈરાનના એક વિદ્યાર્થીના કેસ (તેહરાની વિરુદ્ધ કેનેડા) સાથે સંબંધિત હતો જ્યાં ટ્યુશનની ચૂકવણી ન કરવાને કારણે ઈમિગ્રેશન, રેફ્યુજીસ એન્ડ સિટીઝનશિપ કેનેડા (IRCC) દ્વારા વિદ્યાર્થીની સ્ટડી પરમિટની અરજી નકારી કાઢવામાં આવી હતી. આ ચુકાદો કેનેડામાં અભ્યાસ કરવા માંગતા વિદેશીઓ માટે એક મહત્વપૂર્ણ અવરોધ દૂર કરે છે જેઓ તેમની અભ્યાસ પરમિટની અરજી સબમિટ કરે ત્યારે તેમના ટ્યુશનના તમામ અથવા તેના ભાગની ચૂકવણી કરી શકતા નથી. આ ચુકાદો કેનેડામાં અભ્યાસ માટે જવા ઈચ્છતા હજારો ભારતીય વિદ્યાર્થીઓ માટે રાહતરૂપ સાબિત થશે.
ઈન્ટરનેશનલ સ્ટુડન્ટ્સ માટે કેનેડા હોટ ફેવરિટ દેશ બની ગયો છે. 2022માં કેનેડાએ ઈમિગ્રેશનનો એક નવો રેકોર્ડ તોડી નાંખ્યો હતો. 2022માં 5.50 લાખ કરતાં વધારે ઈન્ટરનેશનલ સ્ટુડન્ટ્સ કેનેડા અભ્યાસ માટે આવ્યા હતા. IRCC દ્વારા જાહેર કરવામાં આવેલા ડેટા પ્રમાણે સૌથી મોટી સંખ્યા ભારતીય વિદ્યાર્થીઓની હતી. જેમાં 2,26,450 ભારતીય વિદ્યાર્થીઓના વિઝા મંજૂર કરવામાં આવ્યા હતા. 31 ડિસેમ્બર 2022 સુધીમાં 8,07,750 ઈન્ટરનેશનલ સ્ટુડન્ટ્સ યોગ્ય સ્ટડી પરમિટ ધરાવે છે. જેમાંથી 3,19,130 ભારતીય વિદ્યાર્થીઓ છે.
ઉચ્ચ અભ્યાસ માટે કેનેડા છેલ્લા કેટલાક વર્ષથી ઈન્ટરનેશનલ સ્ટુડન્ટ્સ માટે હોટ ફેવરિટ બન્યું છે. આ માટેના ઘણા બધા કારણો છે. કેનેડાની ઈમિગ્રેશન પ્રોસેસ એકદમ સરળ છે તથા ત્યાં સ્ટુડન્ટ ફ્રેન્ડલી પોલિસી છે. આ ઉપરાંત રોજગારીનો દર પણ ઊંચો છે અને બહુવિધ સંસ્કૃતિના કારણે ઈન્ટરનેશનલ સ્ટુડન્ટ્સ કેનેડા તરફ આકર્ષાઈ રહ્યા છે.
