મહારાષ્ટ્રના થાણે જિલ્લામાં એક મહિલાએ તેને પરેશાન કરી રહેલા એક ૨૭ વર્ષીય યુવકનું ગુપ્તાંગ કાપી નાખ્યું હતું. પોલીસના જણાવ્યા પ્રમાણે મહિલાએ આ માટે બે અન્ય વ્યક્તિની મદદ લીધી હતી. પોલીસના જણાવ્યા પ્રમાણે મંગળવારે રાત્રે થાણેના નંદીવાલી ખાતે આ બનાવ બન્યો હતો. મળતી માહિતી પ્રમાણે પીડિત યુવક અને ૪૨ વર્ષીય મહિલા એક જ વિસ્તારમાં રહે છે. આ કેસમાં પોલીસે મહિલા અને પુરુષની ઓળખ જાહેર કરી નથી. મહિલાએ પોલીસને જણાવ્યું કે યુવકે છેલ્લા થોડા દિવસોથી તેણીનો ગેરફાયદો ઉઠાવી રહ્યો હતો, તેમજ તેનો પીછો કરી રહ્યો હતો.
જે બાદમાં મહિલાએ આ યુવકને શબક શીખવવાનું નક્કી કર્યું હતું અને પ્લાન ઘડી કાઢ્યો હતો. આ માટે મહિલાએ ૨૨ વર્ષીય તેજસ મહાત્રે અને ૨૫ વર્ષીય પ્રવીણ કેનિયાની મદદ લીધી હતી. પ્લાન પ્રમાણે મહિલાએ મંગળવારે રાત્રે યુવકને એક અવાવરું જગ્યા પર બોલાવ્યો હતો. પોલીસના જણાવ્યા પ્રમાણે યુવક મહિલાની બતાવેલી જગ્યા પર પહોંચ્યો ત્યારે તેજસ અને પ્રવીણે તેની સાથે મારપીટ કરી હતી. આ દરમિયાન મહિલાએ યુવકનું ગુપ્તાંગ વાઢી નાખ્યું હતું. ત્રણેયને સ્થાનિક કોર્ટે ચાર દિવસની પોલીસ કસ્ટડીમાં મોકલી આપ્યા છે. આ અંગે પોલીસે વધુ તપાસ હાથ ધરી છે.
આગળની પોસ્ટ
