ગુજરાતભરમાં ખળભળાટ જગાવનાર આરટીઆઇ એકટીવીસ્ટ અમિત જેઠવાની હત્યાના કેસમાં સીબીઆઇ કોર્ટમાં આજે વધુ બે સાક્ષીઓ ફરી ગયા હતા. સીબીઆઇ સ્પેશ્યલ જજ એમ.કે.દવેએ ફરી ગયેલા આ બંને સાક્ષીઓને કેસમાંથી હોસ્ટાઇલ જાહેર કર્યા હતા. આમ અત્યારસુધીમાં જેઠવા હત્યાકાંડ કેસના ટ્રાયલમાં અત્યારસુધીમાં ત્રણ સાક્ષીઓ ફરીથી ફરી ગયા છે. બે દિવસ પહેલાં જ એક સાક્ષી ફરી ગયો હતો અને તેને પણ કોર્ટે હોસ્ટાઇલ જાહેર કર્યો હતો.
અમિત જેઠવા હત્યા કેસના ટ્રાયલમાં સીબીઆઇ સ્પેશ્યલ જજ એમ.કે.દવેની કોર્ટમાં સુપ્રીમકોર્ટના નિર્દેશાનુસાર ડે ટુ ડે બેઝીઝ પર કેસની સુનાવણી હાથ ધરાઇ રહી છે. જેમાં સુપ્રીમકોર્ટે ૨૬ મહત્વના સાક્ષીઓને ફરીથી તપાસવાનો જે હુકમ થયો છે તેના અનુસંધાનમાં સાક્ષીઓને તપાસવાની કાર્યવાહી ચાલી રહી છે. આજે આ કેસમાં પાનના ગલ્લાવાળા પ્રજાપતિ અને જયેશ પટેલ નામના બે સાક્ષીઓને તપાસવામાં આવ્યા હતા. જેમાં આ બંને સાક્ષીઓએ પોતાની જુબાનીમાં જણાવ્યું હતું કે, તેઓને આ ગુના કે હત્યાકાંડ વિશે કંઇ ખબર નથી. તેઓ આ બનાવ વિશે કશું જાણતા નથી. આમ, આ બંને સાક્ષીઓ ફરી જતાં સીબીઆઇ સ્પેશ્યલ જજે બંને સાક્ષીઓને હોસ્ટાઇલ જાહેર કર્યા હતા. અગાઉ બે દિવસ પહેલાં પણ આ જ પ્રકારે અન્ય એક સાક્ષી ફરી ગયો હતો. જેથી જેઠવા હત્યાકાંડ કેસમાં અત્યારસુધીમાં કુલ ત્રણ સાક્ષીઓ હોસ્ટાઇલ થઇ ગયા છે.
અમિત જેઠવા હત્યા કેસમાં વધુ બે સાક્ષી ફરી ગયા
