માર્ચ મહિનો શરૂ થઈ ગયો છે અને થોડા જ દિવસોમાં ગુજરાત સહિત સમગ્ર દેશમાં તાપમાન વધવા લાગશે. આ વર્ષે જોઈએ તેવી ઠંડી નથી પડી, પરંતુ ગરમીમાં તીવ્ર વધારો થવાની શક્યતા છે. ભારતમાં આ વર્ષે અલ નિનોની સ્થિતિ સર્જાય તેવી શક્યતા છે જેના કારણે માર્ચ મહિનાથી લઈને મે સુધી સખત ગરમી પડશે. હવામાન વિભાગના ડિરેક્ટર જનરલ મૃત્યુંજય મોહાપાત્રાએ જણાવ્યું કે આ વખતે મે સુધી આકરી ગરમી, હીટવેવ અને લૂ લાગવાની શક્યતા છે, તેના કારણે આ ગાળામાં મહત્તમ અને લઘુત્તમ તાપમાન સામાન્ય કરતાં વધુ રહેવાની સંભાવના છે. તેવી જ રીતે આ સમયમાં હીટવેવની સંખ્યા પણ વધુ રહી શકે છે. હાલમાં ઉત્તર ભારતમાં વાતાવરણ પલટાયું છે. જેના કારણે આગામી ત્રણ-ચાર દિવસ સુધી વરસાદ પડવાની શક્યતા છે. છેલ્લા બે દિવસથી અમદાવાદ સહિત ગુજરાતમાં તાપમાન ઘટ્યું છે. પરંતુ આ દોર પૂરો થતા જ તાપમાન વધવા લાગશે. હાલમાં તો જમ્મુ-કાશ્મીર અને હિમાચલ પ્રદેશમાં ભારે હિમવર્ષાના કારણે સામાન્ય જનજીવન ઠપ થઈ ગયું છે. તાજેતરની માહિતી અનુસાર હિમાચલ પ્રદેશમાં હિમવર્ષાના કારણે 600થી વધુ રસ્તા બંધ થઈ ગયા છે.
મૃત્યુંજય મોહપાત્રાએ જણાવ્યું કે, ઉત્તર-પશ્ચિમ, ઉત્તર-પૂર્વ, મધ્યના કેટલાક વિસ્તારોને બાદ કરતા મોટાભાગના ભારતમાં આ વખતે તાપમાન સામાન્ય કરતાં વધારે રહેશે. દેશના કેટલાક ભાગોમાં, ખાસ કરીને રાજસ્થાન, ગુજરાત, મહારાષ્ટ્ર, ઉત્તર પ્રદેશ, બિહાર, ઝારખંડ, પશ્ચિમ બંગાળ સહિતના રાજ્યોમાં હીટવેવવાળા દિવસોની સંખ્યા આ વખતે વધી જશે. મે 2024 પછી દેશમાં સ્થિતિ સામાન્ય બનવાની સંભાવના છે. આ વખતે ફેબ્રુઆરીમાં પણ ખાસ ઠંડી નથી પડી. આ વખતે ફેબ્રુઆરીમાં સરેરાશ લઘુત્તમ તાપમાન 14.60 ડિગ્રી સે. નોંધાયું હતું. વર્ષ 1901 પછી ફેબ્રુઆરીમાં આ સૌથી ઊંચું તાપમાન હતું.
આવી સ્થિતિમાં સ્થાનિક તંત્રે લોકોને શિમલાના પર્વતીય વિસ્તારોમાં પ્રવાસ નહીં કરવાની સલાહ આપી છે. રવિવારે દિલ્હી સહિત ઉત્તર ભારતના રાજ્યોમાં વરસાદ અને કરાં પડયા હતા. ઉત્તર પ્રદેશમાં અલગ અલગ વિસ્તારોમાં વીજળી પડવાના કારણે ચાર લોકોનાં મોત નીપજ્યાં હતા.
