સોશિયલ મીડિયાનો વપરાશ વધ્યા પછી વિવિધ પ્રકારના ગુનાઓમાં પણ જોરદાર વધારો જોવા મળ્યો છે. ખાસ કરીને સોશિયલ મીડિયા જેવા માધ્યમથી છોકરીઓને ફસાવી, છેતરપિંડી, સેક્સ એક્સટોર્શન વગેરે જેવા ગુના વધ્યા છે. તો લોકોનાં મુખે ચર્ચાતા લવ જેહાદના કિસ્સામાં પણ વધારો થયો છે. આવો જ એક કિસ્સો અરવલ્લીના મોડાસામાંથી સામે આવ્યો છે. જ્યાં એક પછી એક બે બહેનો લવ જેહાદનો ભોગ બની હતી. આ ઘટના સામે આવ્યા બાદ સમગ્ર વિસ્તારમાં હાહાકાર મચી ગયો છે. મહત્વનું છે કે, પીડિત પરિવાર મૂળ રાજસ્થાનનો છે અને શ્રમજીવી છે. ત્યારે પોલીસ હવે આ મામલે આગળની કાર્યવાહી કરી રહી છે.
બનાવની વિગતો એવી છે કે, રાજસ્થાનમાં રહેતો શ્રમજીવી પરિવાર ધંધા રોજગારની શોધમાં અરવલ્લી જિલ્લાના સરહદી તાલુકાના ગામમાં આવ્યો હતો. જે બાદ થોડો સમય સુધી તેઓ અહીં રહ્યા હતા. એ પછી જિલ્લાના મુખ્યમથકના ગામમાં રહેવા માટે ગયો હતો. આ પરિવારની સૌથી મોટી દીકરી સાત વર્ષ પહેલાં અમદાવાદમાં રહેતાં એક યુવકના સંપર્કમાં આવી હતી. આ યુવક મુસ્લિમ હતો. એ પછી બંનેએ લગ્ન પણ કરી લીધા હતા.
લગ્નના થોડા સમય બાદ આ યુવક દ્વારા યુવતીને ત્રાસ આપવાનું શરુ કરવામાં આવ્યું હતું. યુવકે યુવતીને ધર્મ પરિવર્તન કરવા, માંસ ખાવા, ધર્મ વિરુદ્ધનું આચરણ કરવા માટે દબાણ અને મજબૂર કરી હતી. એ પછી યુવતીની આંખ ખુલી ગઈ હતી. તેને એવો પસ્તાવો થઈ રહ્યો હતો કે તે કોઈને કહી પણ નહોતી શકતી. એ પછી યુવતી ગમે તેમ કરીને આ યુવકના ચુંગાલમાંથી છૂટવા માગતી હતી અને એવું બન્યું પણ. તે ગમે તેમ કરીને પોતાની જાતને આ યુવકના ચુંગાલમાંથી છોડાવીને ભાગવામાં સફળ રહી અને પછી અમદાવાદ પહોંચ્યા બાદ હિન્દુ સંગઠનો પાસે મદદ માગવા પહોંચી હતી.
એ પછી આખા કાંડનો ભાંડો ફૂટ્યો હતો. બીજી નવાઈની વાત એ છે કે, માત્ર પરિવારની આ દીકરી જ ભોગ નહોતી બની. યુવતીની નાની બહેન પણ આવા જ એક કાવતરાનો ભોગ બની હતી. યુવતીની નાની બહેન સોશિયલ મીડિયા પર ખૂબ જ એક્ટિવ રહેતી હતી. એક દિવસ તેનો સંપર્ક એક યુવક સાથે થયો હતો. યુવકે પોતાનું નામ અને ધર્મ છૂપાવ્યો હતો અને તેને જાળમાં ફસાવવા માટે યોજના બનાવી હતી. આ વાત 2020ની છે.
