મહારાષ્ટ્રના થાણે જિલ્લામાં એક યુવકે પોતાની 12 વર્ષની બહેનનું અફેર ચાલતું હોવાની શંકા રાખી હત્યા કરી નાખી. પોલીસના જણાવ્યા મુજબ, છોકરીને પહેલી વખત માસિક ધર્મ આવ્યું હતું. તે પછી સિક્યોરિટી ગાર્ડની નોકરી કરતા તેના ભાઈને એવી શંકા ઉભી થઈ હતી કે, તેની બહેનના કોઈની સાથે શારીરિક સંબંધ છે. આ શંકા તેના મનમાં એવી ઘર કરી ગઈ હતી કે તેણે પોતાની બહેનને મોતને ઘાટ ઉતારી દીધી હતી. પોલીસે બહેનની હત્યાના મામલે 30 વર્ષના તેના ભાઈની ધરપકડ કરી લીધી છે. મૃતક બહેન માતાના નિધન બાદ પોતાના ભાઈ અને ભાભી સાથે રહેતી હતી.
પોલીસના જણાવ્યા મુજબ, હત્યારા ભાઈએ બહેનને કપડાંમાં લાગેલા લોહીના ડાઘ અંગે સવાલ કર્યા હતા. હકીકતમાં, થોડા દિવસ પહેલા જ છોકરીનો માસિક ધર્મ શરૂ થયો હતો અને તેનું એ લોહી હતું. ભાઈએ તેના કપડાં પરના લોહીના ડાઘ જોયા અને શંકા કરવા લાગ્યો કે, તેનું કોઈની સાથે અફેર ચાલી રહ્યું છે. બાળકીને માસિક ધર્મનું જ્ઞાન ન હતું. એ કારણે જ્યારે ભાઈએ તેને લોહી અંગે પૂછ્યું, તો તે તેનું કારણ સમજાવી શકી ન હતી.
