એક સમયે દુનિયાના નંબર વન ફાસ્ટ બોલર રહી ચૂકેલા દક્ષિણ આફ્રિકાના લોનવાબો સોત્સોબેને મેચ ફિક્સિંગના આરોપમાં આંતરરાષ્ટ્રીય અને ડોમેસ્ટિક ક્રિકેટમાં રમવા પર આઠ વર્ષ માટે પ્રતિબંધિત કરી દેવામાં આવ્યો છે. સોત્સોબે પર આરોપ છે કે તેણે વર્ષ ૨૦૧૫માં દ. આફ્રિકાની ડોમેસ્ટિક ક્રિકેટ ટૂર્નામેન્ટ રેમ સ્લેમમાં ફિક્સિંગ કર્યું હતું.ઉલ્લેખનીય છે કે સોત્સોબે દ. આફ્રિકાનો સાતમો એવો ખેલાડી છે, જેના પર દ. આફ્રિકાના એન્ટિકરપ્શન યુનિટે આવી કાર્યવાહી કરી છે. આ વર્ષે એપ્રિલમાં ક્રિકેટ સાઉથ આફ્રિકાએ સોત્સોબે પર ફિક્સિંગના આરોપ લગાવ્યા હતા.સોત્સોબેએ પોતાના ઉપર લાગેલા ફિક્સિંગના આરોપોનો સ્વીકાર કરી લીધો હતો. સોત્સોબે પર વર્ષ ૨૦૧૫માં રમાયેલી મેચમાં ફિક્સિંગમાં સામેલ હોવાનો આરોપ, સીએસએના એન્ટિકરપ્શન અધિકારીઓ સામે માહિતી છુપાવવાનો પણ આરોપ લાગ્યો હતો. આ ઉપરાંત તેના પર ભ્રષ્ટાચાર, અધિકારીઓને તપાસમાં સાથ ના આપવો, પુરાવા છુપાવવા જેવા અન્ય આરોપ પણ લગાવવામાં આવ્યા હતા.
મેચ ફિક્સિંગનો આરોપ સાબિત થતાં દક્ષિણ આફ્રિકાના લોનવાબો સોત્સોબે પર આઠ વર્ષનો પ્રતિબંધ
