શહેરા તાલુકાના ભોટવા ગામે બે વર્ષ પહેલા પ્રેમ લગ્ન કરીને મહેસાણા ખાતે રહેતા યુવક યુવતી પૈકી યુવતીનું મહેસાણા ખાતે બીમારી દરમિયાન મોત થતા યુવતીના પરિવારજનોએ હોબાળો મચાવીને હાથમાં સળગતા કાકડાઓ તેમજ લાકડીઓ લઈને યુવકના પરિવારના ઘરો તેમજ વાહનો સળગાવી દેતા ભારે ચકચાર મચી ગઈ છે. મકાનોમાં લાગેલી આગ ઓલવવા માટે શહેરા પાલિકાની ફાયરફાયટરનો બંબો પહોંચ્યો હતો. શહેરા પોલીસનો કાફલો પણ ઘટના સ્થળે દોડી આવ્યો હતો. આ મામલે શહેરા પોલીસ મથકે ૧૩ જેટલા વ્યક્તિઓ સામે નામજોગ ફરિયાદ નોંધાઈ છે. પોલીસ ફરિયાદમાં જણાવ્યા મુજબ ભોટવા ગામના સંજયભાઈએ ફળિયામા રહેતી સાહેબસિંહ બારીયાની છોકરી સુનિતાની સાથે ભાગીને બે વર્ષ પહેલા લગ્ન કરેલા હતા. આ મામલે સુનિતાના પરિવારજનોએ સંજયના પરિવારજનો સામે પોલીસમાં પણ ફરિયાદ નોંધાવી હતીે જેના પગલે બંને પરિવાર વચ્ચે બોલચાલનો વ્યવહાર બંધ થઈ ગયો હતો. સંજય અને સુનિતા મહેસાણા રહેતા હતાં. સુનિતાનું બિમારીને કારણ મોત નિપજ્યું થયું હતું. આ મામલાની જાણ સુનિતાના પરિવારજનોને થઈ હતી જેના પગલે સુનિતાના પરિવારજનોએ સંજયના પરિવારજનોના ઘર તરફ આવીને એક પણ વસ્તુ બચવી જોઈએ નહીં તે રીતે બધુ સળગાવી દો તેમ બુમો પાડતા પાડતા ઘરને ચારે તરફથી આગ લગાવી દીધી હતી.
(તસવીર / અહેવાલ :- વિજયસિંહ સોલંકી, પંચમહાલ)
ભોટવા ગામે ૧૩ વ્યક્તિઓએ અન્ય ફળીયાના ઘરોમાં આગ લગાવી
