ભારતીય ઓલરાઉન્ડર રવિન્દ્ર જાડેજાએ મંગળવારે ઓસ્ટ્રેલિયા વિરુદ્ધ સિરીઝના બીજા વનડે મેચમાં એક ખાસ મુકામ હાસિલ કર્યો છે. જામથાના વીસીએ સ્ટેડિયમમાં ૧૦ રન બનાવતા જાડેજા ભારતીય ઓલરાઉન્ડરોના એક ખાસ લિસ્ટમાં સામેલ થઈ ગયો છે. જાડેજા ૫૦ ઓવરના ફોર્મેટમાં ૨૦૦૦ રન અને ૧૫૦થી વધુ વિકેટ હાસિલ કરનારો ત્રીજો ભારતીય ક્રિકેટર બની ગયો છે. તે દિગ્ગજ સચિન તેંડુલકર અને કપિલ દેવની યાદીમાં સામેલ થઈ ગયો છે. ગોડ ઓફ ક્રિકેટના નામથી જાણીતા સચિન તેંડુલકરના નામે ૪૬૩ વનડે આંતરરાષ્ટ્રીય મેચોમાં ૧૮૪૨૬ રન અને ૧૫૩ વિકેટ નોંધાયેલી છે. તો ૧૯૮૩ વિશ્વ કપ ચેમ્પિયન ટીમના કેપ્ટન રહેલા કપિલ દેવના નામે ૫૦ ઓવરના ફોર્મેટમાં ૩૭૮૩ રન અને ૨૫૩ વિકેટ છે. પોતાના કરિયરમાં ૧૪૯મો વનડે રમી રહેલા જાડેજાએ અત્યાર સુધી ૧૭૧ વિકેટ ઝડપી છે. જાડેજાએ નાગપુર વનડેમાં ૧૦ રન પૂરા કર્યા અને આ ખાસ લિસ્ટમાં સામેલ થઈ ગયો. તેણે આ મેચમાં ૪૦ બોલમાં ૨૧ રન બનાવ્યા અને કેપ્ટન વિરાટ કોહલી (૧૧૬)ની સાથે સાતમી વિકેટ માટે ૬૭ રનની ભાગીદારી કરી હતી. તે સિરીઝના પ્રથમ વનડેમાં પણ ટીમમાં હતો પરંતુ તેને કોઈ સમફળતા ન મળી અને બેટિંગમાં પણ તક ન મળી હતી.
સચિન તેંડુલકર અને કપિલ દેવની ખાસ ક્લબમાં સામેલ થયો રવિન્દ્ર જાડેજા
