ભુજ શહેરમાં રાવલવાડી વિસ્તારમાં ચડ્ડી-બનિયાનધારી ગેંગના કેટલાક સાગરિતો કેમેરામાં કેદ થયા છે. તપાસ કરતા આ ગેંગ ભુજ તથા માંડવીમાં આવી હોવાનું સમર્થન મળ્યું હતું. ઘરફોડ ચોરી અને ચોરીમાં નડતરરૃપ બનેલા લોકો પર હુમલો કરતા પણ નથી અચકાતી. આ ગેંગ ગુજરાતમાં સક્રિય થઈ છે ત્યારે તેના કેટલાક સભ્યો ભુજના જુદા જુદા વિસ્તારમાં દેખાતાં કાયદાના રક્ષકોએ આ ગેંગને પકડવા ચક્રો ગતિમાન કર્યા છે.
પ્રાપ્ત માહિતી અનુસાર ભુજના રાવલવાડી વિસ્તારમાં તથા મુન્દ્રા રોડ પર એક કોલેજમાં આ ચડ્ડી-બનિયાનધારી ગેંગ ત્રાટકી હતી, પરંતુ ચોરીમાં સફળતા મળી ન હતી. રાવલવાડીમાં એક મકાનમાં લગાડવામાં આવેલ સીસીટીવી કેમેરામાં આ આ ગેંગના સભ્ય આબાદ રીતે કેદ થયા હતા. વહેલી પરોઢે ૪ વાગ્યા બાદ આ ગેંગ પોતાના શિકારમાં નીકળી હોય તેવું કેમેરામાં દેખાઈ રહ્યું છે. તો અન્ય એક બનાવમાં મહિલા કોલેજમાં પણ આ ચોરો ત્રાટક્યા હોય તેવું સૂત્રોએ જણાવ્યું હતું, પરંતુ કોલેજમાં કશું મહત્ત્વનું હાથ લાગ્યું ન હતું.
કોલેજમાં લગાડવામાં આવેલા કેમેરામાં તે કેદ થયા હતા. માંડવીની પિયાવા હોસ્પિટલ અને જૈન ધર્મશાળા પાસે બે દુકાનોમાં ચોરીનો પ્રયાસ કરતા તસ્કરો કેદ થયા હતા. ચડ્ડી-બનિયાનધારી ગેંગ કચ્છમાં ધામા નાખ્યા હોય તેવું ચિત્ર સ્પસ્ટ થયું છે. તો બીજી તરફ કાયદાના રક્ષકોને પણ આ ગેંગ અંગે સૂચના આપવામાં આવી છે. થોડા સમય પૂર્વે માંડવીના ધવલનગરમાં આ ગેંગ દ્વારા ચોરી કરવામાં આવી હતી. તે દરમ્યાન મહિલાના માથામાં ટામી મારીને ગંભીર ઈજાઓ પહોંચાડવામાં પણ આવી હતી. ત્યારે લાંબા સમયના વિરામ બાદ આ ગેંગ ફરી સક્રિય થઈ હોવાના અણસાર દેખાઈ રહ્યા છે. સીસીટીવી કેમેરામાં કેદ થયેલી ગેંગ અંગે પોલીસ ઈન્સ્પેક્ટર જલુએ જણાવ્યું હતું કે, ફૂટેજ અમને પણ જોવા મળ્યા છે.
પાછલી પોસ્ટ
