ગુજરાતમાં અત્યાર સુધીમાં નકલી સરકારી ઓફિસ, નકલી સરકારી અધિકારી અને નકલી જજ પકડાયા તેના કિસ્સા આગળ વધતા જ જાય છે. પોલીસે હવે એક નકલી IAS અધિકારીને પકડી પાડ્યો છે જેણે જિલ્લા શિક્ષણાધિકારીના નામનો સરકારી નોકરીનો બનાવટી લેટર આપીને લાખો રૂપિયા પડાવી લીધા હતા. અમદાવાદના પાલડી એરિયામાં રહેતા અને ટ્રાવેલ્સનો વ્યવસાય કરતા પ્રતિક શાહની ફરિયાદના આધારે કાર્યવાહી થઈ છે. તેમનું કહેવું છે કે એક વ્યક્તિ તેમની પાસે આવી હતી અને આઈએએસ તરીકે ઓળખ આપીને બે ઈનોવા કાર ભાડે રાખી હતી. બોગસ લેટરના આધારે તેમાં સાયરન અને પડદા લગાવીને અનેક જગ્યાએ તોડ કરવા માટે મેહુલ શાહ નામની વ્યક્તિ પોતાને સનદી અધિકારી તરીકે ઓળખાવતી હતી. મોરબીમાં રહેતા આ ગઠિયાએ અનેક લોકોને સરકારી નોકરી માટેનો અમદાવાદ જિલ્લા શિક્ષણાધિકારીનો ખોટો લેટર આપીને લાખો રૂપિયા પડાવ્યા હોવાની ફરિયાદ નોંધાઈ છે.
પોલીસે આ કેસના મુખ્ય આરોપી મેહુલ શાહની ધરપકડ કરીને વધુ તપાસ શરૂકરી છે. પાલડીના આર્યન ફ્લેટમાં રહેતા પ્રતિક શાહ કાર રેન્ટલનો વ્યવસાય કરે છે. 6 સપ્ટેમ્બરે મેહુલ શાહ નામની વ્યક્તિનો કોલ આવ્યો હતો જેણે પોતાની ઓળખ આઇએએસ અધિકારી તરીકે આપી હતી. તેમણે પ્રતિક શાહ સાથે રોજના 3500 રૂપિયાના ભાડે ઈનોવા કાર લેવાની વાત કરી હતી. સરકારી કામ માટે કારમાં સાયરન અને પડદા લગાડવા બનાવટી લેટર પણ આપ્યા હતા. ત્યાર બાદ 19 ઓક્ટોબરે એક સ્કૂલ ટુર માટે બે લક્ઝરી બસ મગાવી હતી.
પોલીસના કહેવા પ્રમાણે મેહુલ શાહ મિકેનિકલ એન્જિનિયર છે અને વાંકાનેરમાં જ્યોતિ સ્કૂલ અને કીડ્સ વર્લ્ડ નામની સ્કૂલનું સંચાલન કરે છે. આઈએએસ તરીકે રોફ મારવા માટે પોતાની ઓળખ ગૃહ વિભાગના ડિપાર્ટમેન્ટ ઓફ સાયન્સ એન્ડ રિસર્ચ ડેવેલોપમેન્ટના ચેરમેન તરીકે આપે છે અને અલગ અલગ લાલચ આપીને લોકો પાસેથી નાણાં પડાવતો હતો. તેણે વર્ષ 2018થી વાંકાનેરમાં જ IASના બનાવટી લેટર બનાવ્યા હોવાનો ખુલાસો થયો છે.
