ટેક્સાસમાં થયેલા ગમખ્વાર અકસ્માતમાં ચાર ભારતીયો જીવતાં ભૂંજાયા

ટેક્સાસના એન્ના સિટીમાં થયેલા એક ગમખ્વાર અકસ્માતમાં ચાર ભારતીયોના કમકમાટીભર્યા મોત થયા છે. અમેરિકન મીડિયાના રિપોર્ટ અનુસાર ચારેય મૃતકો એક SUVમાં સવાર હતાં જેમાં મલ્ટિ-વ્હીકલ ક્રેશ બાદ આગ લાગી ગઈ હતી.

ગાડીમાં લાગેલી આગ એટલી ભયાનક હતી કે તેમાં સવાર કોઈને પણ બહાર નીકળવાનો મોકો નહોતો મળ્યો અને તમામ ચાર પેસેન્જર્સ જીવતા જ ભૂંજાઈ ગયા હતા. મૃતકોની ઓળખ થઈ શકે તેવી કોઈ નિશાની ના રહી હોવાથી તેમની ઓળખ પ્રસ્થાપિત કરવા માટે DNA ટેસ્ટ કરવામાં આવી રહ્યા હોવાનું પણ જાણવા મળ્યું છે.

કોલિન કાઉન્ટીમાં 30 ઓગસ્ટના રોજ બપોરે સાડા ત્રણ વાગ્યે થયેલા આ અકસ્માતમાં પાંચ વાહનો એકબીજા સાથે અથડાયા હતા, જેમાં SUVમાં સવાર ચાર ઈન્ડિયન્સ અર્કાન્સાસની બેન્ટનવિલ સિટી તરફ જઈ રહ્યા હતા.

આ ઘટનામાં માર્યા ગયેલા મૃતકોની ઓળખ આર્યન રઘુનાથ, તેના મિત્ર ફારૂક શેખ અને લોકેશ પલચારલા તેમજ દર્શિની વાસુદેવન તરીકે કરવામાં આવી છે, જેમાં દર્શિની તમિલનાડુની જ્યારે બાકીના ત્રણ તેલંગાણા અને આંધ્રપ્રદેશના વતની હતા. કોલિન કાઉન્ટી શેરિફ ઓફિસના જણાવ્યા અનુસાર આ અક્સમાતમાં અન્ય ત્રણ લોકો ઘાયલ થયા હતા જેમના નામ જાહેર કરવામાં નથી આવ્યા.

ગમખ્વાર અકસ્માતને કારણે ભરયુવાનીમાં પોતાના દીકરાને ગુમાવનારા ફારૂક શેખના પિતા મસ્તાન વલીએ જણાવ્યું હતું કે તે માસ્ટર્સનો અભ્યાસ કરવા માટે અમેરિકા ગયો હતો અને હાલમાં જ તેનું ભણવાનું પૂરૂં થયું હતું. ફારૂકની બહેન અમેરિકામાં જ રહે છે અને ફારૂકની બોડીની ઓળખ તેમજ તેનો કબજો લેવા માટે તે ત્યાંના અધિકારીઓ સાથે સંપર્કમાં છે.

તેવી જ રીતે હાલમાં પોતાનો અભ્યાસ પૂરો કરનારા આર્યનના પેરેન્ટ્સ તેના કોન્વોકેશનમાં સામેલ થવા અમેરિકા ગયા હતા, તેમની ઈચ્છા હતી કે દીકરો ઈન્ડિયા પાછો આવી જાય પરંતુ આર્યન બે વર્ષ અમેરિકામાં કામ કરવા માગતો હતો. આર્યન તેના દોસ્ત ફારૂક સાથે ડલાસમાં એક કઝિનને મળીને બેન્ટલવિલ પાછો જતો તો ત્યારે તેને આ અકસ્માત નડ્યો હતો.

આ અકસ્માતમાં મોતને ભેટનારો લોકેશ બેન્ટનવિલમાં રહેતી તેની પત્નીને મળવા જઈ રહ્યો હતો જ્યારે તેમની સાથે જ મોતને ભેટેલી દર્શિની યુનિવર્સિટી ઓફ ટેક્સાસમાંથી માસ્ટર્સ ઈન ઈન્ફોર્મેશન સિસ્ટમ્સનો અભ્યાસ પૂરો કરી ચૂકી હતી અને તે અર્કાન્સાસમાં રહેતા પોતાના અંકલને મળવા જઈ રહી હતી.

અમેરિકન મીડિયાના રિપોર્ટ્સ અનુસાર આ અકસ્માત થયો ત્યારે ટ્રાફિક ધીમી ગતિએ આગળ વધી રહ્યો હતો પરંતુ તે વખતે ફુલ સ્પીડ પર દોડી રહેલી એક પીક-અપ ટ્રકે જે કારમાં ચાર ઈન્ડિયન્સ સવાર હતા તેને જોરદાર ટક્કર મારી હતી, ત્યારબાદ આ કાર બીજી ત્રણ ગાડીઓ સાથે અથડાઈ હતી અને તેમાં આગ લાગી ગઈ હતી.

આ ઘટનામાં મોતને ભેટેલા ચારેય ઈન્ડિયન્સ કાર પૂલ કરીને અર્કાન્સાસ જઈ રહ્યાં હતાં અને તમામની ઉંમર 25થી 27 વર્ષની આસપાસ હતી. તેમની બોડી પણ હવે ઈન્ડિયા પાછી લવાય તેવી હાલતમાં ના રહી હોવાથી તમામના અંતિમ સંસ્કાર અમેરિકામાં જ કરાશે તેવું મનાઈ રહ્યું છે.

ઉલ્લેખનીય છે કે, ટેક્સાસમાં હજુ ગયા મહિને જ આ જ પ્રકારનો એક ભયાનક અકસ્માત થયો હતો જેમાં ભારતીય પતિ-પત્ની અને તેમની કોલેજમાં ભણતી દીકરી જીવતા ભૂંજાઈ ગયા હતા. આ કેસમાં મૃતક પરિવાર દક્ષિણ ભારતનો રહેવાસી હતો અને યુનિવર્સિટી ઓફ ટેક્સાસમાં એડમિશન મેળવનારી પોતાની દીકરીને મૂકવા માતાપિતા પણ કોલેજ જઈ રહ્યા હતા ત્યારે આ ઘટના બની હતી.

મૃતક અરવિંદ મણી અને તેમના પત્ની ઓસ્ટિનમાં ઈન્ડિયન કોમ્યુનિટીના કાર્યક્રમોમાં હંમેશા આગળ રહેતા હતા. તેમના આકસ્મિક મોત બાદ તેમના દીકરાને મદદ કરવા માટે ક્રાઉડ ફન્ડિંગથી એક મિલિયન ડોલરથી પણ વધુની રકમ એકત્ર કરવામાં આવી હતી.

Related posts