અમેરિકાની પ્રેસિડન્ટની ચૂંટણી હવે એક રસપ્રદ તબક્કામાં પહોંચી ગઈ છે. ડેમોક્રેટિક પાર્ટીએ જો બાઈડનને હટાવીને ભારતીય મૂળના કમલા હેરિસને પ્રેસિડન્ટ પદના ઉમેદવાર બનાવ્યા છે અને ડોનાલ્ડ ટ્રમ્પે પોતાની આદત મુજબ હેરિસ પર જોરદાર આક્રમણ શરુ કરી દીધું છે. ટ્રમ્પે કમલા હેરિસને ડાબેરી કટ્ટરવાદી લ્યુનેટિક એટલે કે પાગલ પણ ગણાવ્યા છે. આ દરમિયાન હવે એવો સવાલ થાય છે કે ઈન્ડિયન અમેરિકનો કમલા હેરિસને ટેકો આપશે કે નહીં અને તેમનો સપોર્ટ કેટલી મદદ કરી શકશે.
અમેરિકાના કોઈ પણ પ્રેસિડન્ટ પદના ઉમેદવાર ઈન્ડિયન અમેરિકનોની ઉપેક્ષા કરી શકે તેમ નથી કારણ કે તેઓ અમેરિકામાં બીજા નંબરનું સૌથી મોટું ઈમિગ્રન્ટ ગ્રૂપ છે. તેમણે અમેરિકન ઈકોનોમી, સાયન્સ, ટેક્નોલોજી, કલ્ચર સહિત દરેક ફિલ્ડમાં જોરદાર યોગદાન આપ્યું છે. વસતીમાં જે ટકાવારી છે તેના કરતા પોલિટિક્સમાં તેઓ વધુ સારું પ્રતિનિધિત્વ ધરાવે છે. યુએસ કોંગ્રેસમાં 150થી વધારે ઈન્ડિયન અમેરિકનો સિનિયર પબ્લિક સર્વિસ પોઝિશન ધરાવે છે.
કમલાને ઈન્ડિયન અમેરિકનોનો ટેકો મળવાનું શરૂ થઈ ગયું છે. યુએસમાં ઈન્ડિયન અમેરિકન ઈમ્પેક્ટ ફંડ નામે એક નેશનલ રાજકીય સંગઠન છે જે ભારતીય અને સાઉથ એશિયન અમેરિકનોનો અવાજ ગણવામાં આવે છે. આ ફંડે હેરિસને પોતાનો ટેકો જાહેર કર્યો છે અને કમલા કા સાથ, ઈલેક્ટિંગ ધ દેશી પ્રેસિડન્ટ નામે એક કેમ્પેઈન પણ શરૂ કરી દીધું છે.
જો બાઈડને અમેરિકાના પ્રેસિડન્ટની ચૂંટણીમાંથી બહુ ઈમોશનલ રીતે એક્ઝિટ લેવી પડી છે અને હવે આખી જવાબદારી કમલા હેરિસ પર છે જેને હજુ સુધી બરાક ઓબામા જેવા સિનિયર લીડરનો સપોર્ટ નથી મળ્યો. ટ્રમ્પ જેવા આખાબોલા અને માથાભારે લીડર સામે હેરિસ કેવી લડત આપી શકશે તે સવાલ છે કારણ કે અમેરિકાએ અત્યાર સુધીના ઈતિહાસમાં ક્યારેય કોઈ મહિલાને પ્રેસિડન્ટ તરીકે સિલેક્ટ નથી કરી.
આ દરમિયાન કમલા હેરિસને ડેમોક્રેટિક ડેલિગેટ્સનો પૂરતા પ્રમાણમાં ટેકો મળ્યો છે જેથી તેમને પાર્ટીનું નોમિનેશન મળી ગયું છે. બાઈડને એક્ઝિટ કરી ત્યાર પછી હેરિસની ફેવરમાં ભારે સપોર્ટ જોવા મળ્યો છે કારણ કે અમેરિકાને બચાવવું હોય તો ટ્રમ્પને ગમે તેમ કરીને સત્તાથી દૂર રાખવા જોઈએ એવું ઘણા લીડર્સ માને છે. હવે તેમણે પૂરી તાકાતથી કામ કરવાનું છે કારણ કે વોટિંગ આડે માત્ર ત્રણ મહિના બાકી છે.
ઈન્ડિયન ડાયસ્પોરાના વોટ માટે કમલા હેરિસ પૂરી તાકાત લગાવશે કારણ કે અમેરિકાની વસતીમાં ભારતીય મૂળના લોકો ભલે માત્ર દોઢ ટકા હોય, પરંતુ તેઓ બહુ પ્રભાવશાળી વર્ગ છે અને એજ્યુકેશન, બિઝનેસ, પ્રોફેશન દરેકમાં બહુ આગળ છે. અમેરિકામાં કુલ વસતીમાં ભારતીય ડોક્ટરો અને એન્જિનિયરોની સંખ્યા પણ બહુ મોટી છે.
કમલા હેરિસની પોઝિટિવ બાજુ એ છે કે ડોનાલ્ડ ટ્રમ્પનો ભૂતકાળ ખરડાયેલો છે, તેમના લફરા જગજાહેર છે, આ ઉપરાંત તેમની ઉંમર પણ બહુ વધારે છે. તેની તુલનામાં કમલા હેરિસની ઉંમર ઘણી નાની છે, તેઓ હેલ્થકેર, ઈન્ફ્રાસ્ટ્રક્ચર, એબોર્શન રાઈટ્સ જેવા સેન્સિટીવ મુદ્દા પર વાત કરે છે. તેઓ સાઉથ એશિયન અને બ્લેક એમ બે જાતિનું પ્રતિનિધિત્વ કરે છે. આ ઉપરાંત તેમનો પોલિટિકલ ટ્રેક રેકોર્ડ પણ સારો છે.
કમલા હેરિસને માત્ર ઈન્ડિયન અમેરિકન જ નહીં પરંતુ બ્લેક, યુવાનો, મહિલાઓ અને એવા બધા જ લોકો, જેઓ ટ્રમ્પને પસંદ નથી કરતા તેમના વોટ મળી શકશે. બાઈડને પણ પોતાની સ્પીચમાં કમલા હેરિસના વખાણ કરીને કહ્યું કે તે અનુભવી છે, ટફ છે અને સક્ષમ છે. તે આપણા દેશ માટે બહુ જોરદાર લીડર સાબિત થઈ શકે છે. હવે ચોઈસ તમારી છે.
અમેરિકાના કેટલાક પોલિટિકલ એક્સપર્ટ્સ પણ કહે છે કે ઈન્ડિયન અમેરિકન કોમ્યુનિટીનો કમલા હેરિસને ચોક્કસ ટેકો મળશે. બાઈડન આ રેસમાંથી ખસી ગયા અને કમલા માટે જગ્યા કરી આપી તે બહુ સારું છે. ઉંમર એ એક એવું ફેક્ટર છે જે ટ્રમ્પની વિરુદ્ધ જાય છે અને કમલા હેરિસની ફેવરમાં છે. ડેમોક્રેટસને કેટલાક સમયથી એશિયન-અમેરિકન વોટર્સનો ટેકો ઘટતો જતો હતો. પરંતુ કમલા હેરિસના કારણે આ ટ્રેન્ડ બદલાઈ શકે છે. હેરિસે અમેરિકામાં ઈમિગ્રેશન, ફુગાવો, જીવનધોરણનો વધતો ખર્ચ, વગેરે મુદ્દા ઉઠાવ્યા છે અને તેના કારણે તેઓ વોટર્સના એક મોટા વર્ગને આકર્ષી શકે તેવી શક્યતા છે.
ડોનાલ્ડ ટ્રમ્પ અત્યાર સુધી એવું દેખાડવા માગતા હતા કે બાઈડન અનફિટ છે અને હું બધા કરતા ફિટ છું. તેથી તેઓ ગોલ્ફ રમતા હોય તેવી તસવીરો અને વીડિયો શેર કરતા હતા. હવે કમલા હેરિસના કારણે ઉંમરના તફાવતનું ફેક્ટર ટ્રમ્પની વિરુદ્ધ જતું રહ્યું છે.
