આખી દુનિયામાં Microsoftનું સર્વર ડાઉનઃ બેન્કો, એરલાઈન્સનું કામ ઠપ

કોમ્પ્યુટરથી ચાલતા વિશ્વમાં આજે એક એવી ઘટના બની છે જેના કારણે બેન્કો, એરલાઈન્સ, હોસ્પિટલ ચેઈન્સની કામગીરીને અસર થઈ છે. આજે સવારથી માઈક્રોસોફ્ટનું સર્વર ડાઉન થઈ જવાના કારણે કોમ્પ્યુટરને લગતી મોટા ભાગની કામગીરી થઈ શકતી નથી. ટોચની એરલાઈનોને ગ્રાઉન્ડેડ કરવામાં આવી છે અને જ્યાં ઉડાન ચાલુ છે ત્યાં પણ મેન્યુઅલી બોર્ડિંગ પાસ આપવામાં આવી રહ્યા છે. માઈક્રોસોફ્ટનું સર્વર ડાઉન થવાના કારણે ભારત, અમેરિકા, ઓસ્ટ્રેલિયા સહિત તમામ દેશોની ફ્લાઈટ સેવા પર અસર પડી છે.

હાલમાં માઈક્રોસોફ્ટથી ઓપરેટેડ પીસી કે લેપટોપ ચાલુ કરતા જ બ્લુ સ્ક્રીન ઓફ ડેથ (BSOD) વિન્ડોઝ સિસ્ટમમાં દેખાય છે. માઈક્રોસોફ્ટે આજે એક સંદેશમાં જણાવ્યું હતું કે, આ સમસ્યા તાજેતરની ક્રાઉડસ્ટ્રાઈક અપડેટને કારણે ઊભી થઈ છે.

માઈક્રોસોફ્ટના સર્વરમાં આજે સર્જાયેલી ખરાબીને કારણે સમગ્ર વિશ્વમાં હવાઈ સેવાઓ ખોરવાઈ ગઈ છે. સ્પાઈસ જેટે જણાવ્યું કે બુકિંગ, ચેક-ઈન અને બુકિંગ કાર્યક્ષમતા સહિતની ઓનલાઈન સેવાઓને અસર થઈ રહી છે.

દિલ્હી એરપોર્ટે માહિતી આપી છે કે, વૈશ્વિક IT સમસ્યાને કારણે દિલ્હી એરપોર્ટ પર કેટલીક સર્વિસ હાલમાં અસર પામી છે. આવું કેટલા સમય સુધી રહેશે તે કહેવું મુશ્કેલ છે. એરપોર્ટે જણાવ્યું હતું કે, મુસાફરોને ફ્લાઇટની માહિતી માટે સંબંધિત એરલાઇન્સ અથવા સ્થળ પરના હેલ્પ ડેસ્ક સાથે સંપર્કમાં રહેવા વિનંતી કરવામાં આવે છે.

માઈક્રોસોફ્ટ દ્વારા પણ સર્વિસ પ્રભાવિત થવા અંગે નિવેદન જાહેર કરવામાં આવ્યું છે. માઇક્રોસોફ્ટે જણાવ્યું હતું કે, “અમારી સેવાઓમાં હજુ પણ સતત સુધારો કરવામાં આવી રહ્યો છે, અમે તેનો ઉકેલ લાવવાના પગલાં લઈ રહ્યા છીએ. “વધુ માહિતી MO821132 અને એડમિન સેન્ટર https://status.cloud.Microsoft પર મળી શકે છે.”

વિશ્વભરના કરોડો Windows યુઝર્સ આજે એક એરરનો સામનો કરે છે. વિન્ડોઝ ઓપરેટિંગ સિસ્ટમમાં આ એરરના કારણે યુઝર્સના ડેસ્કટોપ, પીસી અને લેપટોપ અચાનક બંધ થઈ રહ્યા છે અથવા રિસ્ટાર્ટ થઈ રહ્યા છે. ઘણી એરલાઈનની ફ્લાઈટ્સ ટેક ઓફ થઈ શકી નથી. એરલાઇન્સના સર્વરમાં આ ખામી અમેરિકા અને ભારત સહિતના દેશોમાં નોંધવામાં આવી છે. સર્વર ખરાબ થવાના કારણે બેંકોમાં કામકાજ પણ અસરગ્રસ્ત થયું છે.

બ્લૂ સ્ક્રીન એરર, બ્લેક સ્ક્રીન એરર અથવા સ્ટોપ કોડ તરીકે પણ ઓળખાય છે. વિન્ડોઝમાં કોઈ મોટી સમસ્યા હોય અને સિસ્ટમ અચાનક બંધ થઈ જાય અથવા ફરી શરૂ થઈ જાય ત્યારે આ પ્રકારની સમસ્યા થાય છે. યુઝર્સ સ્ક્રીન પર ‘Windows has been shut down to prevent loss to your computer’ મેસેજ જુએ છે.

ખાસ કરીને એરલાઈનોને આ સમસ્યાથી વધુ અસર થઈ છે. અકાસા એરલાઈન્સે જણાવ્યું છે કે અમારા સર્વિસ પ્રોવાઈડરની ઈન્ફ્રાસ્ટ્રક્ચર સમસ્યાઓના કારણે અમારી કેટલીક ઓનલાઈન સેવાઓ, જેમાં બુકિંગ, ચેક-ઈન અને બુકિંગ મેનેજમેન્ટ સેવાઓનો સમાવેશ થાય છે તે કામચલાઉ ધોરણે બંધ છે. અમે એરપોર્ટ પર મેન્યુઅલ ચેક-ઇન અને બોર્ડિંગ પ્રક્રિયાઓનું પાલન કરી રહ્યા છીએ. કોઈપણ અસુવિધા માટે અમે દિલગીર છીએ અને તમને ખાતરી આપવા માંગીએ છીએ કે અમારી ટીમો અમારા સેવા પ્રદાતા સાથે આ સમસ્યાને શક્ય તેટલી ઝડપથી ઉકેલવા માટે કામ કરી રહી છે.

Related posts