Aapnu Gujarat
આંતરરાષ્ટ્રીય સમાચાર

કેનેડાની પોસ્ટ-સ્ટડી વર્ક પરમિટમાં મોટા ફેરફાર

કેનેડાની પોસ્ટ-સ્ટડી વર્ક પરમિટ સ્કીમમાં મોટા ફેરફારો આવી રહ્યા છે જેની અસર ભારતીય વિદ્યાર્થીઓ પર ખાસ પડવાની છે. ભારતીયોએ આવામાં વિઝા મેળવવાની શક્યતા તથા પોસ્ટ સ્ટડી વર્ક પરમિટમાં નવું શું આવ્યું છે તેનો વિચાર કરવો જોઈએ. સૌથી પહેલા તો કેનેડાએ પોસ્ટ સ્ટડી વર્ક પરમિટ માટે નવી સ્કીમ કેમ દાખલ કરે છે તેનો વિચાર કરીએ. કેનેડાએ PGWP પ્રોગ્રામમાં અમુક સુધારા કરવા માટે તમામ પ્રોવિન્સ સાથે કન્સલ્ટેશન શરૂ કર્યું છે. તેનાથી કેનેડામાં રહેતા મોટી સંખ્યામાં ભારતીય સ્ટુડન્ટને અસર થવાની શક્યતા છે. હાલમાં કેનેડામાં ભણતા તમામ ઈન્ટરનેશનલ સ્ટુડન્ટને પોસ્ટ-સ્ટડી વર્ક પરમિટ મળે છે. પરંતુ નવી સ્કીમ હેઠળ તેમાં કેટલાક નિયંત્રણ આવશે. હવેથી આ પ્રોગ્રામ એવા ગ્રેજ્યુએટ્સ માટે જ હશે જેમને જે સેક્ટરમાં કામદારોની અછત હોય તેમાં સમાવી લેવાય તેવી શક્યતા હોય.

એટલે કે કેનેડામાં જે જોબ કે ઓક્યુપેશન માટે માણસોની અછત છે તે ફિલ્ડના સ્ટુડન્ટને વર્ક પરમિટ મળે તે માટે કામ કરવામાં આવશે. જ્યારે બીજા પ્રોગ્રામના ગ્રેજ્યુએટ્સ માટે એક્સેસ ઘટાડવામાં આવશે. તેનાથી કેનેડામાં ઈન્ટરનેશનલ સ્ટુડન્ટનું વોલ્યુમ ઘટી શકે છે. લેબર માર્કેટમાં જેની જરૂર નથી તેવા લોકોને પોસ્ટ-સ્ટડી વર્ક પરમિટ કદાચ નહીં મળે. આ સુધારા જાન્યુઆરી 2025થી લાગુ થાય તે રીતે કરવાના છે.
પોસ્ટ-સ્ટડી વર્ક પરમિટ એટલે કે PGWP એ એક કેનેડા સરકારનો એક લોકપ્રિય પ્રોગ્રામ છે જેમાં જે ઈન્ટરનેશનલ સ્ટુડન્ટે ડીએલઆઈ (ડેઝિગ્નેટેડ લર્નિંગ ઈન્સ્ટિટ્યુટ)માં પોતાનો પ્રોગ્રામ પૂરો કર્યો હોય તેઓ કેનેડામાં પોતપોતાના ફિલ્ડમાં અનુભવ મેળવે છે. PGWPનો સમયગાળો કેટલો રહેશે તે કેનેડામાં સ્ટુડન્ટના સ્ટડી પ્રોગ્રામના ગાળા પર આધારિત હોય છે. તે આઠ મહિનાનો પણ હોઈ શકે અને ત્રણ વર્ષ પણ હોઈ શકે છે. પરંતુ જો PGWPની વેલિડિટી પૂરી થાય તે અગાઉ સ્ટુડન્ટના પાસપોર્ટની વેલિડિટી પૂરી થતી હોય તો પાસપોર્ટની એક્સપાયરી ડેટ સુધી જ પરમિટ લાગુ રહે છે.

કેનેડામાં ભણતર પૂરું કર્યા પછી ત્યાંના પીઆર મેળવવા માટે PGWP એ પહેલું પગથિયું છે. ઘણા ભારતીય સ્ટુડન્ટ કેનેડાના પીઆર મેળવવાનું જ ફોકસ ધરાવે છે અને એટલા માટે જ કેનેડા જાય છે. કેનેડા સરકારનો સત્તાવાર આંકડો કહે છે કે 2023માં કેનેડામાં 40 ટકા જેટલા સ્ટડી પરમિટ હોલ્ડરો ભારતીય હતા. ત્યાર પછી ચીનના 10 ટકા અને ફિલિપાઈન્સના 5 ટકા સ્ટડી પરમિટ હોલ્ડર્સ હતા. 2018ની સાથે સરખામણી કરવામાં આવે તો 2023માં PGWPમાં 214 ટકાનો વધારો થયો હતો.

હવે કેવા ફેરફાર આવવાના છે તેની વાત કરીએ. કેનેડા સરકારે ત્યાંના પ્રોવિન્સને કહ્યું છે કે જે ઓક્યુપેશનમાં લોકોની શોર્ટેજ હોય તેમાં ભણતા લોકોને જ PGWP ઓફર કરવામાં આવે. મેપિંગ ડોક્યુમેન્ટમાંથી કોઈ વ્યવસાય બાકાત હોય તો તેને સામેલ પણ કરી શકાય છે.

કેનેડા સરકારના લેટરમાં એવું પણ પૂછવામાં આવ્યું છે કે સ્ટુડન્ટે તેના PGWPને એક વર્ષ કરતા વધારે લંબાવવું હોય તો તેણે શોર્ટેજ લિસ્ટ સાથે સુસિંગત હોય તેવી જોબ ઓફર દેખાડવી પડે કે કેમ. આ ઉપરાંત લેંગવેજ અથવા પ્રોવિન્સિયલ સપોર્ટ જેવા બીજા ધોરણોને પણ પરમિટ એક્સ્ટેન્ડ કરતી વખતે ધ્યાનમાં લેવાય કે નહીં. પ્રોવિન્સને પૂછવામાં આવ્યું છે કે PGWPની એલિજિબિલિટીમાં જે લેબર માર્કેટને લગતા ફેરફાર થવાના છે તે તમામ સ્ટુડન્ટને લાગુ કરવા કે પછી માત્ર નવા સ્ટુડન્ટને લાગુ કરવા જોઈએ.

કેનેડામાં આ ફેરફારો લાગુ થશે તો જેમણે પહેલેથી પોતાનો સ્ટડી પૂરો કરી લીધો છે અથવા જેઓ કેનેડામાં અભ્યાસ પૂરો કરવાની તૈયારીમાં છે તેને કેવી અસર પડશે. એક વાત તમામ એક્સપર્ટ પણ સ્વીકારે છે કે ભારતીય સ્ટુડન્ટને આ ફેરફારોની સૌથી વધુ અસર થશે. પંજાબનું ઉદાહરણ આપીએ તો પંજાબથી કેનેડા ગયેલા મોટા ભાગના સ્ટુડન્ટ સાવ નકામા કોર્સ કરતા હોય છે જેની જોબ માર્કેટમાં કોઈ જરૂર નથી. એટલે કે તેઓ માત્ર સ્ટુડન્ટ વિઝા મેળવવા માટે આવા કોર્સ કરે છે. કોઈ પણ કોર્સની મદદથી સ્ટુડન્ટ વિઝા મેળવીને તેઓ કેનેડામાં સેટલ થવાનું સપનું જોતા હોય છે. તેઓ જે કોર્સ કરે છે તેની કેનેડાના લેબર માર્કેટમાં શોર્ટેજ તો દૂરની વાત છે, ડિમાન્ડ જ નથી હોતી. બીજી તરફ અમુક ફિલ્ડમાં જે લોકોની અછત હોય ત્યાં જોઈએ તેવા માણસો નથી મળતા.

આવા સ્ટુડન્ટને PGWPના ફેરફાર સૌથી વધુ અસર કરશે. કેનેડા ઈન્ટરનેશનલ સ્ટુડન્ટની સંખ્યા પર નિયંત્રણ લાદવા માટે પહેલી વખત આવું કરે છે એવું નથી. જાન્યુઆરીમાં કેનેડાએ વિદેશી સ્ટુડન્ટની સંખ્યા કન્ટ્રોલ કરવા પ્રયાસ કર્યો હતો અને પ્રોવિન્સિયલ એટેસ્ટેન્શન લેટર્સને સ્ટુડન્ટ વિઝાની અરજી માટે ફરજિયાત બનાવ્યા હતા. આ ઉપરાંત ગેરંટેડ ઈન્વેસ્ટમેન્ટ સર્ટિફિકેટ (જીઆઈસી)ની રકમ પણ ડબલ કરીને 20,635 ડોલર કરી નાખી હતી. સ્ટુડન્ટ વિઝા મેળવવા માટે જીઆઈસી આવશ્યક છે કારણ કે તેનાથી દેખાડી શકાય કે અરજકર્તા સ્ટુડન્ટ કેનેડામાં એક વર્ષ માટે પોતાનો ખર્ચ ઉઠાવવાની ક્ષમતા ધરાવે છે.

આ તમામ પગલાંનો હેતુ એક જ છે. જે સ્ટુડન્ટ ખરેખર સિરિયસ નથી તેવા લોકો સ્ટડી પરમિટ માટે અરજી જ ન કરે તેવું કેનેડા ઈચ્છે છે. આ ઉપરાંત ટેમ્પરરી રેસિડન્સની સંખ્યાને પણ સસ્ટેનેબલ લેવલ પર રાખવાની છે.

હવે કોઈ સ્ટુડન્ટને કેનેડાના વિઝા જોઈતા હોય અને PGWPનો પણ લાભ લેવો હોય તો તેમાં પોતાના ચાન્સ વધે તે માટે શું કરી શકાય.
એક્સપર્ટના કહેવા પ્રમાણે સ્ટુડન્ટે એવા સ્કીલ બેઝ્ડ, સ્પેશ્યલાઈઝ્ડ પ્રોગ્રામ પસંદ કરવા જોઈએ જે કેનેડાની લેબર માર્કેટમાં જોબની ડિમાન્ડ સાથે મેચ થતી હોય. એવા જનરલ કોર્સિસ ન કરો જેની કોઈ ડિમાન્ડ ન હોય. હાઈ ડિમાન્ડ ધરાવતા કોર્સ કરશો તો વિઝા અને PGWP બંને મળવાની શક્યતા વધી જશે.

ઉદાહરણ તરીકે બિઝનેસ મેનેજમેન્ટના સ્ટુડન્ટે એકાઉન્ટન્સી જેવા એરિયામાં સ્પેશિયલાઈઝેશનનો વિચાર કરવો જોઈએ. જેઓ હોસ્પિટાલિટીનો અભ્યાસ કરે છે તેમણે રસોઈકળા પર ફોકસ કરવું જોઈએ. કેનેડાના જોબ માર્કેટમાં સાયન્સ, બેન્કિંગ, નર્સિંગ, એન્જિનિયરિંગ, આઈટી, બાયોસાયન્સ, માર્કેટિંગ અને મેનેજમેન્ટ, હ્યુમન રિસોર્સિસ, આર્ટિફિશિયલ ઈન્ટેલિજન્સ, બિઝનેસ ઈન્ટેલિજન્સ, ક્લાઉડ આર્કિટેક્ચર, સિક્યોરિટી એનાલિસિસ, ફાર્મસી વગેરે ફિલ્ડમાં સ્કીલ્ડ લોકોની જરૂર છે તેથી આ તમામ ફિલ્ડ પર ધ્યાન આપો. આ તમામ ફિલ્ડમાંથી કોઈ એકમાં ડિગ્રી મેળવી હોય તો ગ્રેજ્યુએટ્સને વર્ષે 70000 ડોલરથી 1.40 લાખ ડોલર સુધીનો પગાર મળી શકે છે.

ટૂંકમાં જે ઈન્ડસ્ટ્રીનો વિકાસ થઈ રહ્યો હોય અને ગ્રોથની શક્યતા હોય તે ઈન્ડસ્ટ્રી માટે તૈયાર થાવ. PGWPની ચાન્સિસ વધી જાય તે માટે આવા ફિલ્ડમાં શક્ય હોય ત્યાં સુધી નોલેજ અને તાલીમ મેળવો. જોબની ડિમાન્ડ હોય તેવા કોર્સ કરો અનને ઈમિગ્રેશન પોલિસીમાં જે ફેરફાર આવી રહ્યા હોય તેનાથી વાકેફ રહો. ભારતીય સ્ટુડન્ટને આટલી જ સલાહ આપવામાં આવે છે.

Related posts

इराक में सरकार के खिलाफ प्रदर्शन : 42 की मौत

aapnugujarat

पीएम खान कर्ज लेकर चला रहे देश

editor

एरिजोना में छह साल की भारतीय बच्ची की गर्मी के कारण मौत

aapnugujarat
UA-96247877-1