Aapnu Gujarat
બિઝનેસ

અદાણીએ ઈન્ડોનેશિયાનો હલકી કક્ષાનો કોલસો ભારતમાં વેચ્યો : ફાઈનાન્શિયલ ટાઈમ્સ

લંડનના અખબાર ફાઈનાન્શિયલ ટાઈમ્સમાં અદાણી જૂથ સામે એક મોટો આરોપ મૂકવામાં આવ્યો છે. ફાઈનાન્શિયલ ટાઈમ્સ લખે છે કે અદાણી જૂથે ઈન્ડોનેશિયાથી હલકી ગુણવત્તાનો સસ્તો કોલસો ખરીદ્યો હતો અને ભારતમાં આ કોલસો ત્રણ ગણા ભાવે વેચ્યો છે. એફટીના આ અહેવાલ પછી કોંગ્રેસે આ મુદ્દો ઉઠાવી લીધો છે અને કોંગ્રેસના નેતા રાહુલ ગાંધીએ ચેલેન્જ આપી છે કે જો તેઓ સત્તા પર આવશે તો અદાણીના કથિત કોલસા કૌભાંડની જેપીસી દ્વારા તપાસ કરવામાં આવશે. સંસદની સંયુક્ત તપાસ સમિતિને જેપીસી તરીકે ઓળખવામાં આવે છે.

કોંગ્રેસના નેતા જયરામ રમેશે કહ્યું કે ઈન્ડિયા ગઠબંધન આ વખતની ચૂંટણીમાં જોરદાર દેખાવ કરવા જઈ રહ્યું છે ત્યારે મોદાણી (મોદી વત્તા અદાણી)ના મેગા સ્કેમની ટેમ્પો ભરીને વિગતો બહાર આવી રહી છે. ફાઈનાન્શિયલ ટાઈમ્સ લખે છે કે ઓર્ગેનાઈઝ્ડ ક્રાઈમ એન્ડ કરપ્શન રિપોર્ટિંગ પ્રોજેક્ટની તપાસમાં જાણવા મળ્યું છે કે અદાણીએ 2014માં ઈન્ડોનેશિયાથી લો ક્વોલિટીના કોલસાના ઢગલાબંધ શિપમેન્ટ મગાવ્યા હતા અને પછી પબ્લિક સેક્ટરની કંપની તમિલનાડુ જનરેશન એન્ડ ડિસ્ટ્રીબ્યુશન કોર્પોરેશન સાથે છેતરપિંડી કરીને આ કોલસો હાઈ ક્વોલિટી, લો-એશ કોલ તરીકે વેચી માર્યો હતો. આ વેચાણ ત્રણ ગણા ઉંચા ભાવે કરવામાં આવ્યું હતું. જયરામ રમેશે કહ્યું કે અદાણીએ આ રીતે કોલસો વેચીને 3000 કરોડનો વધારાનો નફો કર્યો હતો જ્યારે સામાન્ય માણસે ભોગવવાનું આવ્યું હતું કારણ કે લાઈટનું બિલ વધી ગયું હતું. અને પ્રદૂષણમાં પણ વધારો થયો હતો. જયરામ રમેશનો દાવો છે કે આ કોલસાની ડીલના ઈનવોઈસ દર્શાવે છે કે કોલસાનું ટ્રાન્ઝેક્શન જાન્યુઆરી 2014માં થયું હતું.
આ વિશે રાહુલ ગાંધીએ ટ્વિટર પર લખ્યું છે કે ભાજપ સરકારમાં એક મોટું કોલસા કૌભાંડ બહાર આવ્યું છે. આ કૌભાંડ આમ તો ઘણા વર્ષોથી ચાલતું હતું પરંતુ મોદીજીના પ્રિય મિત્ર અદાણીએ ત્રણ ગણા ભાવે લો ગ્રેડનો કોલસો વેચ્યો હતો અને હજારો કરોડ રૂપિયાની છેતરપિંડી કરી હતી. શું હવે પીએમ જણાવશે કે ઇડી, સીબીઆઈ અને આઈટીનું મોઢું ચૂપ કરાવવા માટે કેટલા ટેમ્પો મોકલવામાં આવ્યા હતા.

રાહુલ ગાંધી દ્વારા ટેમ્પો શબ્દ બહુ સૂચક છે કારણ કે તાજેતરમાં વડાપ્રધાન મોદીએ ચૂંટણી પ્રચાર દરમિયાન એક આશ્ચર્યજનક વાત કરી હતી. મોદીએ કહ્યું હતું કે રાહુલ ગાંધી અદાણી અને અંબાણી વિશે બહુ બોલતા હોય છે પરંતુ હવે કેમ નથી બોલતા. કોંગ્રેસના શાહજાદા જાહેર કરે કે આ ચૂંટણીમાં અંબાણી-અદાણી પાસેથી કેટલો માલ ઉઠાવ્યો છે, કાળા ધનની કેટલી બોરી મળી છે? ટેમ્પો ભરીને નોટો કોંગ્રેસ માટે પહોંચી છે કે શું? શું સોદો થયો છે કે તમે રાતો રાત અંબાણી-અદાણીને ગાળો બોલવાનું બંધ કરી નાખ્યું? જરૂર દાળમાં કંઇક કાળું છે. કોઈને કોઇ ચોરીનો માલ ટેમ્પો ભરીને તમે મેળવ્યો લાગે છે. આવું મોદીએ કહ્યું હતું.

કોંગ્રેસના નેતા જયરામ રમેશે કહ્યું કે વડાપ્રધાનના નિકટના મિત્રોએ છેલ્લા એક દાયકામાં કાયદાનો ભંગ કરીને અને ભારતીયોનું શોષણ કરીને પોતાની જાતને કેટલી ધનવાન બનાવી છે તે વાતનો આ વધુ એક પૂરાવો છે.

બીજી તરફ અદાણી જૂથે લંડનના ફાઈનાન્શિયલ ટાઈમ્સના રિપોર્ટને ખોટો અને નિરાધાર ગણાવીને નકારી કાઢ્યો છે. કંપનીએ કહ્યું કે તે કોર્પોરેટ ગવર્નન્સના ઉચ્ચ ધોરણોનું પાલન કરે છે અને તમામ કાયદા અને નિયમોને અનુસરવા માટે પ્રતિબદ્ધ છે.

એફટીએ પોતાના રિપોર્ટમાં કહ્યું છે કે અદાણીએ એર ક્વોલિટીના ભોગે બમ્પર નફો મેળવ્યો હોય તેવી શક્યતા છે કારણ કે લો ગ્રેડનો કોલસો વાપરવામાં આવે તેનો અર્થ એવો થયો કે પાવર પેદા કરવા માટે વધારે ઈંધણ બાળવું પડશે.

અદાણીના કોલસા વિશે રિપોર્ટમાં બહુ મોટી શંકા વ્યક્ત કરવામાં આવી છે. ફાઈનાન્શિયલ ટાઈમ્સનો રિપોર્ટ કહે છે કે ઈનવોઈસ પરથી જાણવા મળે છે કે અદાણી જૂથે 2014માં ઈન્ડોનેશિયાના કોલસાનું એક શિપમેન્ટ ખરીદ્યું હતું. તેમાં પ્રતિ કિલોગ્રામ 3500 કેલેરી એનર્જી હોવાની સૂચના અપાઈ હતી. ત્યાર પછી આ કોલસો તમિલનાડુ જનરેશન એન્ડ ડિસ્ટ્રીબ્યૂશન કંપનીને 6000 કેલરીના કોલસા તરીકે વેચવામાં આવ્યો. આ કેલરી બહુ હાઈ ગ્રેડ કોલસો ગણવામાં આવે છે. ટ્રાન્સપોર્ટેશનના ખર્ચને ધ્યાનમાં રાખવામાં આવે તો અદાણીએ તેના રોકાણની સામે લગભગ ત્રણ ગણો નફો મેળવ્યો હોય તેવું લાગે છે.

આ રિપોર્ટમાં એવું પણ જણાવાયું છે કે ભારતમાં દર વર્ષે લગભગ 20 લાખથી વધુ લોકો આઉટડોર એર પોલ્યુશનના કારણે મૃત્યુ પામે છે. ધ લેન્સેન્ટમાં 2022માં પબ્લિશ થયેલા એક રિસર્ચ પર આ માહિતી આધારિત છે. આ ઉપરાંત એવું પણ જાણવા મળ્યું છે કોલસાથી ચાલતા વીજમથકોના કારણે બાળમૃત્યુદરમાં પણ વધારો થયો છે. કોંગ્રેસે દાવો કર્યો છે કે લોકસભાની ચૂંટણી પછી ઈન્ડિયા એલાયન્સની સરકાર બનશે તો કથિત કોલસા કૌભાંડની તપાસ કરવા માટે એક જેપીસી રચવામાં આવશે.

Related posts

દિગ્ગજ કંપનીઓમાં નવી ભરતીમાં ૩૫૦ ટકાની વૃદ્ધિ

aapnugujarat

૨૦૧૮માં ભારતનો જીડીપી ગ્રોથ વધીને ૭.૫% થશે : મોર્ગન સ્ટેન્લી

aapnugujarat

સર્વિસ પીએમઆઈ આંકડો વધીને ૫૨.૫ સુધી પહોંચ્યો

aapnugujarat
UA-96247877-1