અદાણી-હિંડનબર્ગ કેસની તપાસ માટે સુપ્રીમ કોર્ટ દ્વારા રચવામાં આવેલી નિષ્ણાત સમિતિનો રિપોર્ટ શુક્રવારે જાહેર કરાયો. ૨૪ જાન્યુઆરી, ૨૦૨૩ ના રોજ અમેરિકન શોર્ટ-સેલિંગ ફર્મ હિંડનબર્ગે અદાણી ગ્રૂપની કંપનીઓ અંગે એક અહેવાલ બહાર પાડી કંપનીના શેરોની કિંમતને ઓવરવેલ્યૂ તથા એકાઉન્ટમાં ગરબડ કરાઈ હોવાનો આરોપ મૂક્યો હતો.
જોકે હિંડનબર્ગના આરોપોને અદાણી જૂથે ફગાવી દીધા હતા. પરંતુ વિપક્ષે આ મુદ્દે હોબાળો મચાવ્યો અને જ્યારે મામલો સુપ્રીમ કોર્ટમાં પહોંચ્યો ત્યારે સુપ્રીમ કોર્ટે તપાસ માટે વિશેષ સમિતિની રચના કરી હતી. હવે આ સમિતિનો રિપોર્ટ સામે આવ્યો છે.
સુપ્રીમ કોર્ટ દ્વારા રચવામાં આવેલી નિષ્ણાત સમિતિના રિપોર્ટમાં કહેવામાં આવ્યું છે કે અદાણી જૂથે તમામ લાભાર્થી માલિકોનો ખુલાસો કર્યો છે. આ સાથે એવું પણ કહેવામાં આવ્યું છે કે સેબી દ્વારા એવો કોઈ આક્ષેપ કરવામાં આવ્યો નથી કે તેઓ અદાણીના લાભાર્થી માલિકોના ઘોષણાને નકારી રહ્યાં છે. હિંડનબર્ગના રિપોર્ટ બાદ અદાણીનો રિટેલ હિસ્સો વધ્યો છે. રિપોર્ટમાં સ્પષ્ટપણે જણાવવામાં આવ્યું છે કે વર્તમાન નિયમો કે કાયદાનું પ્રથમ દ્રષ્ટીએ કોઈ ઉલ્લંઘન જોવા મળ્યું નથી.
રિપોર્ટમાં કહેવામાં આવ્યું છે કે સેબીપાસે હજુ પણ ૧૩ વિદેશી સંસ્થાઓ અને મેનેજમેન્ટ હેઠળ સંપત્તિ માટે ૪૨ યોગદાન આપનારાઓ વિશે પૂરતી માહિતી નથી.
આ રિપોર્ટ સેબીને એ ચકાસવા મુક્ત કરે છે કે શું ૧૩ સંસ્થાનો જેમની તપાસ લંબિત છે તેમાં શું કોઈ અન્ય મામલો બનાવવામાં આવે? રિપોર્ટમાં ઈડીના કેસનો ઉલ્લેખ કરતી વખતે સેબીએ પ્રથમ દ્રષ્ટિએ કોઈ આરોપો લગાવ્યા નથી. રિપોર્ટમાં જાણવા મળ્યું છે કે અદાણીના શેર ભારતીય બજારોને અસ્થિર કર્યા વિના નવા ભાવે સ્થિર થયા છે. આ ઉપરાંત રિપોર્ટમાં સ્ટોકને સ્થિર કરવા માટે અદાણીના પ્રયાસોને સ્વીકારવામાં આવ્યા છે.
સુપ્રીમ કોર્ટ દ્વારા રચવામાં આવેલી વિશેષ સમિતિએ તેના રિપોર્ટમાં જણાવ્યું હતું કે તમામ તપાસ સમયમર્યાદામાં પૂર્ણ કરવાની જરૂર છે. સમિતિ હાલમાં એવું નિષ્કર્ષ આપી શકતી નથી કે ભાવમાં હેરફેરના આરોપમાં નિયામકની નિષ્ફળતા રહી છે. સમિતિએ તેના રિપોર્ટમાં કહ્યું કે બજાર નિયામકે સમૂહોની સંસ્થાઓના માલિકીના સંબંધમાં તેની તપાસમાં નિષ્કર્ષ રજૂ કર્યા છે. રિપોર્ટમાં કહેવાયું છે કે અદાણીના શેરોમાં અસ્થિરતા ખરેખર વધારે જોવા મળી હતી જેનું કારણ હિંડેનબર્ગનો રિપોર્ટ અને તેના પરિણામો છે.
અદાણી-હિંડનબર્ગ કેસમાં તપાસ સમિતિની અદાણીને ક્લિનચિટ
