મહુવા તાલુકાના હળદવા ગામે વિધવા પ્રેમિકાનો અન્ય સાથે પ્રેમસંબંધ હોવાનો વહેમ રાખી પરણિત પ્રેમીએ કોદાળીથી ફટકો મારી મોતને ઘાટ ઉતારી દેવાની ઘટનામાં મહુવા પોલીસ દ્વારા આરોપી પ્રેમીની ધરપકડ કરી આગળની કાયદેસરની કાર્યવાહી હાથ ધરી છે. મહુવા તાલુકાના હળદવા ગામમાં નાયકી ફળિયા ખાતે રહેતી વિધવા દેવિકાબેન કિરીટભાઈ પટેલ(ઉં-37) પર તેના પ્રેમી જીતેશ ઉર્ફે જીતુ શંકરભાઇ પટેલએ (રહે.ખૂંટી ફળિયા, વહેવલ) ધામખડીના પુરુષ સાથે પ્રેમ સંબંધ હોવાનો વહેમ રાખી બુધવારે સવારથી જ ઝઘડો કરતો હતો.બંને પ્રેમી વચ્ચે આ બાબતે બોલાચાલી થતા મામલો ઉગ્ર બન્યો હતો. જેથી પ્રેમી જીતુ ઉશ્કેરાઈ જઈ તેની પ્રેમિકા પર કોદાળી થી હુમલો કર્યો હતો. અને માથાના ભાગે તેમજ શરીરના ભાગે કોદાળી મારતા વિધવા મહિલાને ગંભીર ઇજાઓ થતા તેનુ ઘટના સ્થળે જ મોત નીપજ્યું હતું. આ બનાવ બાદ મહુવા પોલીસનો કાફલો ઘટનાસ્થળે આવી કાયદેસરની કાર્યવાહી હાથ ધરી હતી.તો બીજા દિવસે ડીવાયએસપી તેમજ મહુવા પીએસઆઇ બી.બી.પરધાને સહિતના અધિકારીઓ હળદવા ખાતે આવી આ બનાવ અંગે વધુ તપાસ હાથ ધરી હતી.વિધવા પ્રેમિકાને મોતને ઘાટ ઉતારનાર વહેવલના જીતુ શંકર પટેલની મહુવા પોલીસ દ્વારા ધરપકડ કરી આગળની વધુ પૂછપરછ હાથ ધરી છે ત્યારે મહુવામાં વધુ એક હત્યાનો બનાવ સમગ્ર પંથકમાં ચર્ચાનો વિષય બન્યો છે.
મહુવામાં વિધવા પ્રેમિકાની હત્યા કરનાર પ્રેમીને પોલીસે ઝડપી પાડ્યો
